Dialuna 8 Psicologo Arubiano a cuminsa estudio ‘GZ-Psycholoog’ pa Psicologo specialisa den cuido di salud .Aki ta unda cu 18 persona di cual 8 psicologo y ortopedagogo di Aruba y 10 participante procedente di Bonaire, Curaçao y Sint Maarten lo participa na e estudionan aki cu ta sumamente importante y desea na Hulanda.
E specialisacion den psicologia aki lo ta un granaporte na e calidad profesional di e ayudo psicologico aki na Aruba y lo forma un gran aporte na e sistema di ‘mental health’ cu Fundacion Respaldo a institui na Aruba.
Despues di finalisa e estudio intensivo aki, e 8 psicologonan di Aruba lo ta registra den e sistema ‘BIG’ di Hulanda. Esaki ta nifica cu nan lo hiba un titulo responsabel y proteha cu ta valido na Hulanda tambe.
Un elogio grandi ta bay pa e director Eric Jansen y su staf di ‘Mental Health Caribbean‘ na Boneiro y tambe pa e ‘Opleidingsinstituut Rino Zuid’ cu hunto a colabora pa trece e estudio renombra aki pa Aruba y e otro islanan.
Na Aruba, Respaldo ta e instituto, bishita y cualifica door di ‘Rino Zuid’, y lo funciona como instituto educacional di practica pa e estudio aki. E estudio ta wordo carga dor di Fundacion Respaldo den colaboracion cu SVGA (Stichting Verstandelijk Gehandicapten Aruba).
Tur respet ta bay pa nos 8 psicologonan cu a cuminsa cu e estudio aki. Nan lo haci esaki banda di nan trabou diario y esaki ta lo exigi algun aña di hopi estudio, training y desaroyo personal.
Participantenan ta 4 psicologo di Respaldo, 2 di SVGA y 2 di Ministerio di Educacion. E 4 participantenan di Respaldo ta trahando na e seccion Policlinica pa psikiatria di mucha y hoben.
Fundacion Respaldo ta sumamente consciente di e importancia di estudionan bon cualifica cu ta duna hopi atencion na mucha y hoben, cu ta e futuro di nos pais Aruba.
