Un di cada tres asesinato cu ta sucede alrededor di mundo ta na America Latino y Caribe. “Ta e region cu mas violencia di planeta, lagando afo tur zona di guera”, Banco Interamericano di Desaroyo (BID) a bisa den un estudio tocante e costo cu violencia tin den e region. Latino America ta gasta mas di su producto interno bruto (PIB) na seguridad, compara cu pais desaroya cu tin indice mas abao di violencia, contrario na loke hopi hende ta pensa.

Mientras cu Merca ta inverti 2,7%, Francia 1,87% y Alemania 1,34% na seguridad, anto region di Latino America ta inverti te 3.55%. “No ta existi un relacion cu por afirma cu si un estado ta gasta mas na seguridad publico, anto e ta haya menos criminalidad”, Laura Jaitman, coordinador di estudio a splica. E trabao di investigacion di Jaitman a analisa 17 pais, y tin como titulo “Crimen y su costo: evidencia nobo y hayazgo na America Latino y Caribe” E documento cu a wordo publica siman cu a pasa, ta mustra e necesidad cu tin pa tur gobierno sa, si e uso cu nan ta duna na nan presupuesto ta funciona of no.

Mayoria di situacion di crisis den tema di violencia na America Latino tin un relacion cu decision di pidi mas polis, mas ekipo, pero nos no tabata sa cual ta e costo cu e violencia ta produci”, Nathalie Alvarado, hefe di area di seguridad ciudadano di BID a splica.

Aki ta sigui 8 dato cu ta splica cual ta e costo di violencia y crimen pa region di Latino America

 1.US$261.000 miyon
Un di e principal descubrimentonan na cual e autornan di estudio aki a yega, ta cu violencia y crimen ta costa America Latino y Caribe te US$261.000 miyon. E cifra ta representa un 3,55% di PIB cu e region aki ta produci. “Crimen y violencia ta logra un nivel hopi cerca di un crisis”, autornan di estudio a bisa. “Latino America tin 9% di poblacion di mundo, pero ta registra 1/3 di victima di homicidio na nivel global”

2.Violencia ta costa US$300 pa cada persona
Si nos dividi e costo total aki, nos ta haya cu violencia ta costa un promedio di US$300 pa cada habitante di tur pais analisa. Di e cantidad aki, 126 dollar ta destina pa gasto di gobierno, pa asina por paga e costo di polis y nan sistema hudicial. Mayoria di hende ta sinti obligacion pa inverti 111 dollar na su seguridad priva, mientras cu 63 dollar ta inverti den costo social. Costo social ta sucede ora cu algun persona no ta genera placa, pasobra e por ta victima di violencia, o esun cu ta den prizon y cu no ta aporta nada di placa na e sistema economico.

3.Seis biaha mas placa ta inverti den lucha contra violencia
E gasto cu gobierno y persona priva ta haci na America Latino y Caribe pa combati inseguridad, ta nifica menos placa pa otro area, cu por duna mas oportunidad y desaroyo na cualkier pais. E gasto di violencia ta loke por a inverti den infrastructura, manera caminda, hospital, scol, sistema di transporte, lugar publico y social. Na Mexico y Brasil costo di inseguridad ta costa mas placa, en comparacion cu placa cu nan ta inverti den programa di combati pobresa.

4. 90% di victima ta hende homber
Nuebe di cada dies caso di violencia tin hende homber como victima, según investigacion na 17 pais cu BID a studia 50% di victima di violencia tin entre 15 y 30 aña, hende cu ta mas productivo economicamente pa cualkier sociedad.“Nos ta destrui nos capital futuro di America Latino, pa motibo di violencia y crimen”, pasobra tur region ta perde hende cu ta capital humano y ta mira nan crecemento comprometi, Alvarado a bisa.

5. Dos biaha mas asesinato di hende muhe
Aunke violencia ta envolve den su mayoria hende homber, hende muhe no ta liber di sufri violencia na America Latino y Caribe. Den e region ta existi dos biaha mas asesinato di hende muhe en comparacion cu cifranan mundial, cu tin un indice di 2.3 caso pa cada 100 mil hende muhe. “Ta asesina hende homber na caminda y hende muhe ta muri na nan cas. Otro grupo di muhe por muri pa violencia den su famia, aunke e indice ta mas abao”, Alvarado a bisa.

6. 1,6% di PIB di Honduras
BID a haya sa cu Honduras ta e pais cu indice di homicidio mas halto na America Latino y na mundo. E conclusion aki ta cu Honduras tin un costo di 1.6% di nan PIB, kier men, cerca di US$640 miyon, na crimen relaciona cu asesinato, solamente.

7. US$70.000 miyon pa seguridad publico
BID a conclui cu gobierno di America Latino y Caribe a gasta te US$70.000 miyon na prevencion y pa combati inseguridad publico. “Gasto di gobierno pa delito ta costa cerca di un tercer parti di tur placa inverti na educacion y salud” , e estudio a conclui. 1.55 % di PIB di Latino America ta destina na seguridad, e parti mas grandi ta pa polis di cada pais.

8.US$13.800 miyon na prizon
Gobiernonan di America Latino y Caribe ta inverti na construccion y mantenemento di prizon, pero e gasto ey ta un desperdicio, si nan no ta inverti den rehabilitacion di prizonero. BID a haya sa cu di aña 2010 te 2014 region di America Latino a inverti US$13.800 miyon na sistema di prizon, pa dos rason hopi importante: Un di nan ta cu construccion y mantencion di prizon a costa US$6.500 miyon, pero cu pa prome biaha BID a haya un metodo confiabel pa determina cu poblacion di prizon lo por a produci cerca di US$7.300 miyon.

“Nos sa cu inversion den prizon talbes no ta e miho decision, pasobra nos ta aumenta e cantidad di hende cu ta biba den prizon, cu mas gasto na prizon y nos no sa si e inversion aki ta funciona” Alvarado a bisa.