Trahadonan den servicio di CITGO-Aruba y kendenan a yega di traha cu Valero ta na spera cu nan situacion laboral lo wordo aclaria. Unabes cu gobierno di Aruba a anuncia cu despues di varios luna di negociacion finalmente lo wordo firma un acuerdo di entendimento (MoU) cu CITGO, pa asina traspasa e refineria y e terminal.
Sindicato FTA ta representa un grupo di trahadonan di staf, nan tin 27 miembro na CITGO. Tambe ta buscando mas claridad rond di e situacion aki. Diabierna ultimo FTA mester a reuni cu gerente general di CITGO, pero e reunion a wordo cancela y FTA ta spera cu e lo por tuma luga e siman aki.
Nan a yega di reuni cu e compania estatal Refineria di Aruba (RdA), caminda Gobierno a bisa cu lo keda cu e minimo di trahado pa opera e terminal y atende cu e refineria, cu pa FTA lo mester ta 40 pa 45 hende. Pues esunnan cu no ta keda mester wordo paga minimo nan cesantia. Total tin alrededor di 77 trahado cu ainda ta den incertidumbre riba nan futuro laboral. Tin un grupo di trahadonan afilia na IOWUA, kende actualmente ta traha den e terminal cu ta abastece nos isla di combustibel y jet fuel cu nan ta haya cu a wordo negosha sin tene cuenta cu nan.
Despues di e MoU cu mester wordo firma ainda pa ambos partido, gobierno di Aruba y CITGO, tambe mester bin un TSA of Acuerdo pa Suspension Temporal. E acuerdo aki kiermen cu gobierno lo haya espacio pa busca un operador nobo. Prome Minister Evelyn Wever-Croes a yega di anuncia cu tin un grupo di 25 compania interesa den e operacion di e refineria na San Nicolas, y nan lo sondea un compania serio cu lo por brinda garantia pa tuma over e refineria.
Tanten CITGO ta keda e dunado di trabou y nan ta responsabel -segun nos ley laboral- pa cumpli cu tur nan responsabilidad cu e trahadonan cu ainda ta na nan servicio. Unabes cu gobierno di Aruba por haya un compania nobo cu ta tuma over e operacion di e refineria, e ta esun cu ta tuma e trahadonan automaticamente. Pero te ainda tin un caminda por ta largo pa cana den e capitulo nobo aki di historia di refineria na Aruba.
