76% di alumno di La Salle College a slaag: Director Davelaar: “E speransa ta cu den e di dos tijdvak mas alumno por slaag”

Diaranson ultimo diferente scol avansa rond di Aruba tabatin nan uitslagdag, dia di resultado, pa e studiantenan den examenklas. Un dia yena cu hopi emocionnan encontra, algun contento otro nan menos contento, pero na final di dia, hopi alivia cu fin di fin di aña escolar a yega.

La Salle College ta un di e scolnan cu a organisa nan uitslagdag y den entrevista pa Bon Dia Aruba, director di e scol, Igmar Davelaar, a splica cu e aña aki e porcentahe di graduado, 76% ta un poco mas abao compara cu aña pasa, pero tin speransa ainda cu e cifra aki lo subi.

“E aña aki nos porcentahe ta un tiki mas abao cu aña pasa. Pa e prome tijdvak 76% di e alumnonan a slaag. Nos ta spera cu e ta bay subi pasobra tin e di dos tijdvak. Tin algun mucha pa motibo di malesa nan no a logra slaag den e prome tijdvak, pero e confiansa t’ey cu nan ta bay slaag, kiermen e porcentahe ta bay subi,” director Davelaar a remarca.

El a indica cu e aña escolar a bay hopi lihe y e dia pa parti resultado ta yega den un habri y sera di wowo. El a enfatisa cu como docente, nan ta splica e alumnonan tambe cu e aña ta bay hopi lihe, specialmente pa e candidatonan di examen y semper nan ta keda push e hobennan pa nan haci nan maximo esfuerso.

Davelaar a señala cu e cifra di 76%, mas abao cu aña pasa, ta debi na un algun factor cu mester tene na cuenta ainda, entre otro covid. “E aña aki ta 76%, nos tin e periodo di covid ainda cu ta hungando un rol y e speransa ta, manera mi a splica, cu den e di dos tijdvak mas alumno por slaag y mi ta spera cu nos por yega den careda di 80% y in principio e lo ta mescos cu aña pasa,” el a bisa.

El a agrega cu e aña aki pa e alumnonan e tabata un tiki mas dificil pa slaag pasobra aña pasa nan a pone e normanan den un otro forma teniendo cuenta cu covid. E aña aki no tabatin esey, e tabata normal, dus e tabata un tiki mas dificil pa e alumnonan.

Dia 23 di juni La Salle College ta organisando un fiesta pa recauda fondo pa yuda e studiantenan di e scol cu ta den situacionnan di necesidad. “Nos tin bastante alumno cu tin problema na cas, nos ta yama nan ‘zorg leerlingen’, dus nos kier haci algo pa nan y e ora a dicidi di bin cu e fiesta aki pa recauda fondo pa yuda nan cu sea paga buki, paga aircogeld, schoolgeld. Nos kier yuda nos alumnonan y di e forma aki nos por yuda nan,” el a finalisa.