E fugitivonan, den su mayoria miembronan di un banda Brasileño di trafico di arma di candela y droga, a logra huy a traves di un tunnel, Elena Andrada, portavos di e polis fronteriso di Pedro Juan Caballero a splica.
Minister di Husticia, Cecilia Perez a condena a suceso y a bisa prensa cu e construccion di e tunnel a tuma ‘varios siman’. Te awor e director di e penal a ser retira di su funcion, tambe un dozijn di guardia a keda aresta. Entre e 76 persona cu a scapa, 40 ta di nacionalidad Brasileño y 36 di nacionalidad Paraguayo.
Ademas, el a splica cu e detenidonan a huy den cinco pickup cu despues a ser kima y haya na Ponta Pora, un ciudad di Brasil cu tin un avenida so na frontera cu Paraguay. Tambe a bisa cu e ta kere cu ‘tin un categorico complicidad di funcionarionan di e prizon’.
Pa captura e fugitivonan bek, a aumenta siguridad na frontera di estado Brasileño di Mato Grosso do Sul, Antonio Carlos Videira, secretario di Husticia y Siguridad a splica.
Tambe, departamento di Operaciones Fronterizas, Policía Militar de Carreteras y tropa di siguridad, acompaña di un helicopter a uni pa e buskeda, segun Perez a sigura.
Minister di Husticia di Brasil, Sergio Moro a laga conoci su apoyo pa captura e fugitivonan bek. “Si nan ta regresa Brasil, nan lo tin un boleto pa bay na un prizon federal”, el a skirbi riba su cuenta di Twitter.
Mayoria di e personanan cu a huy ta pertenece pa e Primer Comando Capital (PCC). Segun e website InsightCrime, PCC ‘ta e organisacion criminal mas grandi di Brasil, cu ta conta cu su presencia den mayoria di estadonan di e pais ey, ademas di controla e rutanan di droga entre Brasil, Bolivia y Paraguay’.
