Minister di Asunto Social y Labor, Glenbert Croes ta consciente cu nan ta hayando critica riba otorgamento di FASE (Fondo di Asistencia Social di Emergencia). E mandatario a admiti cu nan ta criticanan cu rason.

Pero e mandatario ta haya cu cada un mester asumi nan responsabilidad, segun e fout cu ta wordo cometi. Ya cu tin hende cu no ta cumpli debidamente cu e rekisitonan, por ehempel nan ta pone nan number di cuenta fout, y nan ta tira culpa riba FASE.

El a admiti y asumi cualkier responsabilidad relaciona cu tur problema cu a yega di surgi cu otorgamento di FASE. Ciudadanonan ta keha cu nan a aplica pa FASE, y nan no ta hayando contesta pa nan inkietud, locual a causa malestar den comunidad. Igualmente el a pidi dispensa na nos comunidad, ya cu a presenta un problema cu a prolonga pa dos siman. Segun e mandatario nan ta resolviendo e problemanan di comunicacion.

Croes a informa cu nan lo bin cu un otro call assistent center pero fortifica. E lo conta cu un sistema fortifica pa duna contesta inmediato riba tur inkietud di comunidad. Tambe otro siman FASE su website lo bay tin un tabel pa esnan cu no a haya pago ainda, cu un click nan ta haya un comunicacion directo.

Nan a dicidi di bin cu e call center nobo aki awor cu a wordo aproba e extension di e programa di FASE pa tres luna mas. E no ta descarta cu mirando e situacion economico di nos pais, kisas mester di un ronda mas di FASE. El a bisa cu cantidad di personal di diferente departamento y instancia ta bin trahando cu alma y curpa pa resolve e problemanan cu ta wordo presenta. Pero e hecho ta cu nan a logra paga otro siman 10 mil hende di FASE, kiermen cu nan ta yegando na un total di casi 18 mil evaluacion individual.

E ta un trabao cu a cuminsa den menos cu tres luna. Pero nan mester di yudansa adicional –segun e mandatario – pa nan por tin solucion pronto segun nos comunidad mester. E ta haya cu mirando e magnitud di e problema actual, e organisacion di FASE mester wordo fortifica. Segun e mandatario e kier wak un FASE organisa y fortifica pa brinda solucion.

Fundacion Pa Nos Comunidad

Tambe mandatario a laga sa cu fundacion Pa Nos Comunidad a haya un aporte financiero di 750 mil florin di gobierno di Aruba for di presupuesto di ministerio di Asunto Social cu Parlamento a aproba unanimamente ayera.

E placa aki ta wordo delanta for di presupuesto complementario cu mester bin na caminda, unda lo tin cierto cambio debi na e crisis di Covid. E suma aki ta wordo destina pa pakete di cuminda pa yuda esnan den necesidad. Nan a yam’e pakete Covid, ya cu e no ta contene cuminda so, sino elemento di higiena tambe. Esaki ta bay den coordinacion cu CEDE Aruba y otro instancianan.