E momento a yega cu mester corta algun mata di mangel pa asina e proyecto di e brug eleva riba Spaans Lagoen por continua.
Ayera Sr. Jossy Kock kende ta e funcionario di DOW encarga cu e proyecto di Green Corridor a informa cu alrededor di 750 meter cuadra di mata di Mangel lo wordo corta, aunke e no a papia di e cantidad di matanan cu lo wordo corta. El a bisa cu nan a reduci e area aki lo maximo cu tabata posibel den e area cu nan mester sembra e pin of pilarnan cu ta sostene e brug aki.
Inicialmente e area cu mester sacrifica di manglo tabata mas grandi, mas cu 1.125 meter cuadra. Pero despues di evaluacion di expertonan nan a logra di reduci casi na mita pa evita cu e impacto contra e manglo lo ta mas grandi loke ta nifica cu e impacto pa nos medio ambiente lo ta minimo posibel.
Nan ta bay delinea na cada banda di Spaans Lagoen kico lo wordo haci segun e documento. Den e documento aki ta para tambe cu lo bay rehabilita un parti pa stimula e crecemento di e manglo nan. Ya caba unda nan mester a corta algun manglo den e prome fase di e proyecto aki, nan ta ripara cu e mata aki a cuminsa crece. Cu e mesun pensamento ey, nan ta bay corta e di dos parti y ultimo di e manglo, segun Sr. Kock.
Consehero
Sr. Kock a bisa cu e proceso aki ta conta cu e conseho di un experto di afo riba e mata di mangel kende ta esun cu ta duna conseho pa evita un impacto ecologico grandi, y un compania local cu ta supervisa y controla tur dia cu e trabou cu e empresa CIS (representante di e compania ODENSA) ta realisa pa construi e brug debidamente cu nan exigencianan ambiental. Sr. Kock a indica cu mester uzo di un experto di Hulanda, ya cu nos por tin profesional na Aruba pero no uno specialisa den profundidad riba e tereno aki.
Nan mester corta e matanan di manglo aki, ya cu nan ta stroba e construccion di e brug. Pa e motibo aki –segun sr. Kock- nan kier laga nos pueblo sa cu “den e proximo dianan ta cuminsa corta e manglo nan pa asina haci e parti ey liber pa nan por sigui cu e construccion di e brug”.
Sr. Kock a bisa cu for di cu nan ta den e proyecto aki, nan ta haciendo uzo di e experto sr. Laurends cu ta traha na Universidad di Wageningen. Cu ayudo di dje, nan a traha un plan con e matanan di manglo mester wordo corta y kico ta bay ta e compensacion cu e contratistanan mester haci pa asina nan por construi e brug. E experto Hulandes y e compania local ta traha conhuntamente pa introduci cierto reglanan cu e contratista di Green Corridor tin cu cumpli cun’e pa no trece daño grandi na e sitio y pa tur cos cana conforme nan plan pa salvaguardia e manglo nan lo mas posibel.
Tambe el a laga sa cu den e construccion di e proyecto aki nan ta uzando material cu no ta perhudica of afecta e medio ambiente den e area aki. Sr. Kock a bisa cu e contratista encarga ta monitor e calidad di e awa diariamente pa wak si tin algo robes for di e dia cu nan a cuminsa traha den e area di Spaan Lagoen.
Encuanto envolvimento di organisacion local di medio ambiente riba e proyecto aki, sr. Kock a bisa cu den e prome rapport cu a wordo produci riba impacto ambiental pa un compania local, e compania aki a tene contacto diferente experto local cu a aporta na e documento aki.
