Un informacion importante cu directora di departamento di Impuesto, Luenne Gomez-Pieters a trece dilanti tin di haci cu e suma recauda a base di impuesto den caha di gobierno durante 2019.
Nan a registra 731.6 miyon florin na entrada di impuesto te cu november 2019. E cifra aki ta representa 87% di loke ta nan presupuesto 2019. E presupuesto ta poni na 845.2 miyon. Un presupuesto cu el a cualifica como ‘hopi grandi.” Pero tambe un encargo hopi pisa pa e departamento aki.
Gomez-Pieters a afirma cu e departamento aki t’ey pa garantisa cobransa di impuesto. Pero tambe pa facilita e cliente pa por cumpli cu nan deber fiscal, dunando un servicio optimal. El a indica cu miles di transaccion ta tuma luga pa dia pa asina nan por garantisa e cobransa di impuesto na tempo, el a bisa.
E meta strategico di e departamento aki ta keda vigente y madurez di e organisacion ta un meta strategico hopi importante pa nan. Den e caso aki nan proceso tambe mester ta hopi mas eficiente pa nan por ta mas eficaz ora di cobra impuesto.
E cumplimento di e responsabilidad aki tambe ta keda un meta strategico cerca nan. Den esaki nan ta den un proceso di digitalisacion cu ta tumando luga den fase. Dos fase importante durante e trayecto di digitalisacion aki cu a inicia aña pasa a wordo finalisa.
