Diasabra ultimo a tuma luga e proyecto Hardin di Alimentacion na Scol Basico Dornasol e cual a conta cu ayudo tanto di e cabesante di scol Zuleika Arends y su ekipo como tambe di mariniers ken a yuda pa e hardin lo a keda cla den tempo record.
Proyecto Agroforestia na scolnan ta bin tumando luga for di luna di januari caminda Ministerio di Sector Primario y Naturalesa conhuntamente cu Living Soil Aruba pa asina promove interes di sector primario na e muchanan cu ta bay haya oportunidad educativo pa siña tocante agricultura sostenibel usando tecnicanan di Agro Forestry pa mehora e calidad di suela y mas cu tur cos, elimina e uso di pesticida.
Ademas di esey, e proyecto ta aporta na siguridad di alimentacion y autosuficiencia cu un enfoke riba scolnan cu kisas por tin limitacion pa por yega na e tipo di proyectonan aki kisas pa limitacion financiero.
Scolnan a cuminsa registra for di november di aña pasa , unda directivanan di scol lo mester a haya carta cu tur splicacion pa asina aki nan por haya tur detaye relaciona cu e proyecto aki, minister Ursell Arends a informa cu 10 scol a ser scogi pa participa den e proyecto a base di algun criterionan specifico, manera motivacion di scol, tereno disponibel cu awa y coriente y tambe e compromiso di scolnan pa participa den e proyecto cu ta den full swing.
Mediante un publicacion riba su rednan social, minister Arends a sigura cu ya caba Scol basico Washington y Scol Primario Kudawecha a cuminsa haya nan cosecha, diasabra ultimo e beurt tabata pa scol Dornasol na unda ekipo di scol lidera pa e cabesante Zuleika Arends y mariniers a duna nan aporte pa e hardin di alimentacion aki cu den poco tempo lo haya e cosecha di loke nan a sembra diasabra ultimo.
E proyecto ya caba ta yegando na su final, 7 scol a haya nan hardin caba y ainda ta falta Scol Caiquetio dia 25 di mei, Scol Paso pa Futuro dia 1 di juni y Pius X School dia 8 di juni.
“E proyecto aki ta parti di un esfuerso pa promove practicanan agricola duradero y enfatisa e importancia di siguridad di alimentacion bou di e siguiente generacion. Stimulando integracion di practicanan di agricola sostenibel den e curiculo pa e muchanan. Invertiendo den e maestronan ta invertiendo directamente den e futuro di e muchanan, minister Arends a sigura.”
