Biblioteca Nacional di Aruba lo presenta nan siguiente edicion di e Simposio di Educacion di Sostenibilidad ‘Sustainable Education Symposium’ (SES) cu lo tuma luga 2 pa 6 di september na Biblioteca cu e tema di ‘Hof’i Bario’.
Astrid Britten, Director di Biblioteca Nacional, hunto cu Ronny Alders kende ta iniciado di e projecto a splica tocante nan prome actividad pa loke ta trata aña escolar 2019/ 2020 cu ta enfoca riba agricultura.
Despues di varios luna di preparacion, 7 scol secundario y avansa lo participa den e siman di e simposio. Colegio San Nicolas ta esun di apertura dialuna 2 di september. Otro scol ta John Wesley (MAVO), EPB Oranjestad, Abraham De Veer, IPA San Nicolas, Mon Plaisir College (MAVO) y Filomena College (MAVO).
Britten ta splica pa motibo cu biblioteca su espacio ta limita por yega na 5 dia di scol pa participa den e simposio aki. “Tur esaki ta den cuadro di nos programa di sostenibilidad, unda cu cada scol lo bin pa haya informacion. Tin cu bisa cu e aña aki ta ‘community gardening’ cual ta traduci nos ta usa hof’i bario.
Nan enfoke e aña aki ta riba e parti di agricultura. Director di Santa Rosa, Nathalie Maduro, kende ta partner di cu biblioteca nacional pa diferente aña, tambe lo ta un orador. Nan tin orador di Hulanda, Henk van Dort, cu segun Britten tin ‘un bunita proyecto di Hulanda’.
Ingela Lacle, cu su expertisio den agricultura, tambe ta orador hunto cu James Ocalia y Joase-Anne van der Biest kende ta traha riba e mesun tereno y Gregory Fung A Fat di United Farmers Aruba.
Britten a bisa cu ta spera di tin un programa interactivo unda cu por brinda informacion, pero cu hende cu ta presente por haci pregunta. Pa e parti di atardi, lo ta bay tin tur dia un cooperacion cu e programa di 2:30pm te cu 4:00pm, ta bay tin tayer pa studiantenan for di 6 pa 17 aña di edad.
E tayer ta uno gratis y por registra cerca Janine of Giselle via 5821580, tambe por registra na e website di Biblioteca Nacional. E Lo tuma luga na Sala Diamante. Pa publico general, lo tin un anochi di lectura gratis diaranson, 4 di september di 7:00pm te cu 9:00 pm.
Ronny Alders, kende a inicia e proyecto a bisa cu ta un reto grandi pero a haci’e posibel ‘cu hopi smaak y energia’ pa brinda studiante di scol secundario y avansa ‘lectura di calidad’ cu persona experto di Aruba y Hulanda den e simposio.
“Pa e parti di mainta, scolnan a reacciona sumamente positivo ora cu a yama nan pasobra scol ta kere den sostenibilidad. Nan ta kere cu Aruba mester drenta y sigui e era di sostenibilidad”, Alders ta expresa.
Segun Alders, biblioteca nacional di Aruba como institucion educativo ta un pionero riba e tereno for di 8 aña pasa cu a cuminsa cu projecto pa biblioteca y comunidad di Aruba.
Pa e parti di educacion di bibloteca ta ‘sumamente importante’ pa studiante y maestro tin acceso na buki y material di sostenibilidad di ‘hof’i bario’ den biblioteca nacional Oranjestad y San Nicolas.
Alders tambe a comparti e parti integral di anochi di lectura, nan lo bay tin vendors den e sala di Unoca cu ta habri for di 6or di atari cu entrepeneurs local lo bende nan producto sostenibel na un prijs accesibel pa pueblo por cumpra y haya nan informacion.
Pa finalisa el a agrega cu Santa Rosa y Biblioteca Nacional lo tin un stand pa duna informacion.
