Aruba Airport Authority (AAA) lo duna inicio na un proyecto di rehabilitacion di e posicionnan di parkeo 1 y 2 balora na 7 miyon dollar.
Esaki ta informacion for di un relato di AAA.
E proyecto lo encera cambio di e superficie di concret, instalacion di e infrastructura pa e ‘fuel hydrant system’, y e mudamento di e fundeshi nobo pa e brugnan pa pasahero, pa asina aumenta e tamaño di gate 2 pa acomoda avionnan mas grandi, di tipo ‘wide-body’ di categoria E manera avionnan B-787 y A-330.
E proyecto lo conclui cu e instalacion di dos brug di pasahero nobo. E proyecto ta parti di aeropuerto su programa continuo di mehoracion di capital pa renoba partinan cu ta birando bieu y si ta posibel mehora e flexibilidad di e facilidadnan di aeropuerto, segun nan.
E proyecto lo tuma luga den 2 fase; fase 1 lo cuminsa dialuna, 3 di juli y lo rekeri pa aeropuerto cera posicionnan di parkeer 2 y 3 pa un periodo di 6 siman. Ora cu fase 1 keda cla, fase 2 lo cuminsa, unda cu gate 3 lo bolbe den servicio mientras cu gate 1 y 2 lo wordo cera pa un periodo di 4 luna, cu fecha pa keda cla dia 14 di december.
Retonan
E ceramento di e gate nan lo causa un cantidad di reto pa e operacionnan diario pa aeropuerto. Pero varios proceso pa por traha rond di e proyecto lo wordo implementa pa asina minimalisa e impacto riba e pasahero y operacionnan di avion, segun AAA.
Manager di Airport Development Monthy Croes ta bisa cu e ta hopi optimista riba e proyecto: “E proyecto aki a wordo bon plania y nos ta ansioso pa cuminsa cu e ehecucion. Nunca lo tin un momento ideal pa reduci capacidad na un aeropuerto cu ta opera cu volumen nan peak. Pero e proyecto aki ta critico pa por sigui mantene e facilidadnan di aeropuerto, y ora e keda completa, lo duna e ekipo di operacion mas flexibilidad na momento di traha e schedule y na mes momento ta renoba infrastructura cu a bira bieu, cu ta di suma importancia pa un aeropuerto moderno. Nos enfoke lo ta pa sigura cu e proyecto wordo entrega na tempo, prome cu e temporada peak di winter.”
