DVG a publica un biaha mas un resumen unda cu ta reporta e desaroyo di COVID-19 aki na Aruba.
Den e resumen di awe, a mira cu 699 persona a recupera, mientras cu a registra 517 caso nobo di cual 106 no ta residente. E cifranan aki ta representando un tasa di positividad bao di nos residentenan di 62 porciento.
E cantidad di casonan activo di COVID-19 pa awe ta un total di 2825 caso y e cantidad di fayecidonan relaciona cu COVID-19, lamentablemente a aumenta te cu 184 persona. Datonan ta ilustra cu e casonan nobo di COVID tin un averahe semanal di 634 caso nobo pa dia y un averahe semanal di tasa di positividad di 63 porciento pa dia.
Actualmente na Aruba tin 42 persona interna cu of debi na COVID-19, di cual den unidad di cuido intensivo, tambe yama ICU tin 4 persona, y riba e piso general tin 38 persona interna. Na Colombia tin actualmente 3 persona interna den ICU y ninguno (0) riba piso general.
Di e personanan cu lamentablemente a fayece, un persona no tabata vacuna, y un persona tabata parcialmente vacuna cu solamente un dosis.
Pa e motibo aki, Crisis Team ta sigui encurasha esunnan cu te ainda no a vacuna pa sali y ricibi nan vacuna. E vacuna ta efectivo y por salba bida ora drenta den contacto cu e virus. Tambe e personanan cu a tuma un solo dosis di e vacuna, mester sigui tuma e demas dosisnan pa asina por ricibi proteccion completo.
E vacuna contra di COVID-19 ta consisti di un serie di 2 of 3 dosis dependiendo di e edad di e persona. Cu un solo dosis un persona no ta completamente proteha.
