(EFE) – 68% di Peruanonan ta defende e necesidad di anticipa eleccionnan presidencial y legislativo como un salida na e crisis politico cu e pais ta bibando na e momentonan aki, segun loke un sondeo di Instituto di Estudio Peruano (IEP) a revela ayera diadomingo na corant La Republica.
Segun e estudio, dos tercio di poblacion nacional ta di acuerdo pa adelanta eleccionnan pa eligi un presidente nobo cu lo substitui Pedro Castillo, otro congresistanan y pa reemplasa e integrantenan actual di Camara di Diputado Peruano cu fraccionnan domina pa oposicion.
Un 31% so di personanan encuesta a mustra den contra di e alternativa aki, un porcentahe cu ta mas di 37% den area rural y 40% na centro y sur di e pais.
Otro 4% kier pa e mandatario bandona presidencia y vice-presidente Dina Boluarte lo asumi su funcion.
Di otro banda, encuesta a revela cu Castillo a mantene su desaprobacion cerca di 67% di e poblacion, similar na 68% cu a registra na maart ultimo, mientras cu 25% so ta aproba su gestion.
65% ta kere cu e presidente, ken a asumi e funcion na juli di 2021, no lo caba su mandato di cinco aña, un 63% ta pensa cu “no ta capaz pa goberna” y un 30% ta pensa cu “nan no ta lag’e dirigi e Ehecutivo”.
E estudio tambe a puntra pa e percepcion di e ciudadanonan riba loke ta trata e escenario politico di e pais pa loke a revela cu 73% di e poblacion ta considera cu e situacion politico ta pio cu 12 luna atras, un porcentahe cu na october ultimo tabata situa cerca di 50%.
E sondeo aki a wordo realisa entre 18 y 21 di april unda a encuesta 1.206 persona, tin un margen di eror di 2.8% y un nivel di confiansa di 95%.
