Un cantidad di 667 Peruano lo por haci uzo di nan derecho di voto den cuadro di eleccion pa presidente diadomingo awor.
Sra. Giovana Tapia-Guzman kende pa 11 aña caba ta coordinador consular di Peru na Aruba a bisa cu 967 Peruano ta aparece registra den Censo di Aruba, pero e comunidad ta mas grandi, ya cu ora nan ta obtene e nacionalidad Hulandes, nan mester renuncia na nan nacionalidad Peruano. E ora ey nan no ta aparece como Peruano sino como Hulandes.
Eleccion na Aruba
El a informa na Bon Dia Aruba cu e eleccion presidencial aki ta tuma luga pareu cu Peru. E ta tuma luga diadomingo awor 10 di april fei 8’or di mainta te cu 4’or atardi den e mesun compleho di local unda Don Jacinto Restaurant ta situa riba De La Sallestraat. Aunke na Peru e sistema di voto ta electronico aki na Aruba e ta bay manual.
E coordinador consular di Peru na Aruba a informa cu esun cu lo por haci uzo di nan derecho di voto ta ciudadano di mas cu 18 aña. Nan mester tin nan documento nacional di identidad Peruano na ordo, kiermen nan mester aparece cu e direccion di Aruba.
El a aclaria cu no lo tin loke ta wordo yama “mesa di transeunte”. Tampoco no lo por haci uzo di su voto esun cu tin documento di identidad di Peru, pero cu ainda ta aparece Peru como nan sitio di residencia, en bes di Aruba. El a bisa cu e hendenan aki no lo por vota, ya cu e registro electoral ta cla y e ta bin for di Peru. “Tur cos ta bin di Peru completamente cla cu e nombernan completo den e registro electoral”, el a bisa.
Votado Peruano na Aruba
Normalmente e 667 Peruanonan cu derecho di voto ta esun cu ta aparece debidamente registra pa vota na Aruba. Pero eventualmente lo tin hendenan cu ta aparece riba e registracion y cu nan no ta bibando mas na Aruba, pero ainda nan no a haci cambio riba nan sitio di residencia. E situacion aki ta trece cun’e cu nan no lo por vota den niun luga, ya cu nan ta aparece registra manera si nan ta bibando na Aruba locual no ta e caso.
Igualmente el a notifica na Peru riba un impasse cu a sosode cu e codigo di e pais di residencia. “Mi no sa kico a pasa na Peru, ya cu e personanan cu ta haci nan documento na Peru, nan residencia no ta aparece cla, of nan no sa maneha bon e codigo”, el a bisa.
Normalmente e Peruanonan lo por diligencia e documento nacional di identidad fei Aruba mes den oficina di coordinador consular di Peru na Aruba. Pero ora cu nan ta bay haci e proceso aki na Peru mes, tin biaha nan codigo ta aparece registra den otro pais di nos region y no na Aruba.
Sra. Tapia-Guzman a declara na Bon Dia Aruba cu e personanan cu e tipo di problema aki lo ricibi un carta di “exoneracion” di Organismo Nacional Electoral (ONP) y tambe fei instancia cu ta manera e documento di identidad mes, pa nan no confronta problema ora cu nan ta biaha pa Peru. E ta splica cu votacion na Peru ta obligatorio y esun cu no ta vota lo haya un boet. P’esey e grupo di votado Peruano den exterior cu ta confronta problema cu e codigo di pais di residencia nan no lo por vota pero si nan lo ricibi un carta di exoneracion pa nan no paga e boet.
Hurado di votacion
El a bisa cu nan ta aplica tur e reglanan electoral. Awe nan ta ricibi for di nan embahada na Venezuela tur e material electoral. E eleccion aki lo tin tres mesa di votacion cu nan respectivo hurado. E cuerpo di hurado ta consisti di 9 persona, tres pa cada mesa, y cada un di nan a wordo nombra fei di Peru mes. E autoridad electoral Peruano a manda un credencial pa cada un di nan, caminda como maximo autoridad electoral di Peru na Aruba, nan mester firma varios documento pa duna autoridad pa nan funcion.
E biaha aki –segun Sra. Tapia-Guzman- mayoria di cuerpo di hurado ta hende jong. Cinco aña pasa durante e ultimo eleccion e huradonan tabata hendenan adulto cu mas experiencia. Te hasta algun di e miembronan di hurado ta hobennan di origen Peruano, pero cu a nace na Aruba mes, pero cu ainda nan no a adopta e nacionalidad Hulandes.
Den caso cu un hurado no presenta, nan mester warda mas tarda te 9’or di mainta pa e mesa di votacion ey lo por habri. Den caso cu e hurado no ta presenta mes, nan ta puntra e prome persona cu ta para riba rij si e ta disponibel pa bira hurado.
E cuerpo di hurado lo haya training prome cu e votacion lo habri, ya cu nan tin cu cumpli cu cierto reglanan. “Nan ta reglanan cu no ta bin fei di e Consulado. Tampoco mi no ta bin cu e reglanan aki sino cu nan ta bin directamente fei di ONP. E reglanan aki nos mester cumpli nan”, el a bisa.
Contamento di voto
Na Peru ta existi e dobel eleccion of ronda electoral den caso cu niun di e candidato lo haya e mayoria di e votonan, kiermen e mita di e cantidad di voto deposita plus un. Ya caba a wordo stipula e fecha di dia 5 di juni venidero ya cu ta wordo premira cu niun di e 10 candidatonan no lo haya e mayoria di e votonan den e prome ronda.
E contamento di voto lo tuma luga despues di 4’or atardi ora cu e votacion ta cera. E ta calcula cu e conteo di voto lo tarda entre 1 ora pa 1 ora y mey, pues e ta kere cu pa banda di 5’or y mey atardi ya nan lo sa exactamente cual di e candidatonan presidencial Peruano a gana na Aruba.
Pa garantisa e transparencia den e proceso di contamento di voto lo tin presencia di un representante di e embahada di Peru na Caracas pa supervisa esaki. Ademas e ciudadanonan Peruano cu lo desea di ta presente lo mag di t’ey. Unico cos cu e ta pidi ta pa tur hende identifica su mes y comporta nan mes bon y cu respet.
Finalmente, coordinador consular di Peru na Aruba, Sra. Giovana Tapia-Guzman ta formula pa tur Peruano debidamente registra pa vota na Aruba den eleccion presidencial di nan pais natal, lo por haci uzo di e derecho aki diadomingo awor.
