Zoologico ta test efecto di hemp oil riba stress di olifanti

(AP) — Cientificonan na zoologico di Warsaw na Polonia ta tumando muestra di sanger, slijm y otro muestranan di e tres olifanti di e zoologico den dianan recien, pa prepara pa test si duna nan hemp oil por reduci nan stress.

Dr. Agnieszka Czujkowska, un veterinario di e zoologico, a bisa cu hemp oil tambe conoci como CBD of cannabidiol oil, a proba di reduci ansiedad y stress den otro animalnan, incluyendo cabay y cacho.

Expertonan di e zoologico a kere cu ta logico pa mira si e tambe por yuda nan animalnan, incluyendo giraf, rhinoceros y beer polar. Nan a dicidi, sinembargo, pa cuminsa nan test riba nan tres olifanti Africano, cu a pasa den periodonan di stress despues di fayecimento na maart di un olifanti hembra mas bieu, Erna.

“Basicamente stress ta tur caminda y nos no sa kico ta bay pasa den futuro”, Czujkowska a bisa. “Por ta un di e olifantinan lo cay na estado, por ta lo tin un lesion algun biaha. Nan por kibra nan djente – esey ta pasa. Nan por bira malo sin motibo”, el a bisa. “Nos kier tin algo cu lo yuda nan pasa suavemente door di e periodo aki.”

Mientras e estudio a genera titulonan sensasionalista, Czujkoswka a splica cu hemp oil no ta un droga y ta diferente di marihuana pasobra no ta contene THC, e principal componente psicoactivo den cannabis.

Si e estudio duna resultado spera, e azeta simplemente ‘lo calma nan un tiki’ y tin beneficionan anti-inflamatiorio, entre otro. “E lo traha den diferente manera pero no lo duna nan ningun ‘high’. Hemp oil no ta un droga”, el a agrega. “Nos nunca lo duna nada cu ta peligroso pa animalnan.”

E y e zookeepers a trece e unico olifanti macho, Leon den un area cera diabierna, y for di pafo di un haula protectivo nan a yega na dje pa saca muestra di sanger y slijm. El a obedece su keepernan mientras nan a dun’e orden pa hisa su trompa pa nan por tuma swab di slijm.

Alrededor di 300 muestra – di sanger, slijm, orina y feces – a ser tuma durante ultimo siman den preparacion.

Entre otro, e cientificonan ta midiendo e nivelnan di cortisol, e hormoon di stress, den e olifantinan. Si tur cos bay bon, nan lo por cuminsa administra druppel di hemp oil aki algun siman, pero ta spera cu lo dura hasta dos aña pa haya resultadonan di e estudio, segun Czujkowska.