Vocero di Departamento di Impuesto, sra. Meverly Romano a bin cu cifranan cu ta revela cu mayoria di automobilistanan no a cumpli ainda debidamente cu e pago di impuesto di vehiculo di motor pa 2016.
“Mi tin cu bisa cu na nomber di departamento di Impuesto nos no ta contento cu e cifranan y cu e resultado cu nos ta wak”, el a bisa. Na e momento aki pa aña 2016 nan tin 74 mil 440 number registra den e diferente categoria. Di e cantidad aki tin un total di 46.058 number cu no ta paga completamente. E cifra aki ta representa 62% di automobilistanan cu no a cumpli cu e pago di impuesto pa e concepto aki.
E no ta descarta cu e sistema di sticker cu a keda introduci e aña aki por a hunga un rol, pero tin otro factor. Den nomber di e departamento di Impuesto e no kier responsabilisa polis pa e falta di control.
Pago impuesto vehiculo 2017
Di otro banda, ya cu nos ta den december caba y pronto nos lo inicia un aña fiscal nobo, tambe el a informa cu e pago di impuesto pa vehiculo di motor 2017 ta posibel entrante awe. Esaki ta posibel den tur facilidad di Servicio Impuesto Aruba (SIA).
Unabes cu e cliente ta mustra cu el a paga full 2016, y cu tin su papel di seguro na ordo, e por paga su number di auto ya sea den kwartaal of full aña. Nan ta haya nan sticker di biaha cu e respectivo color cora pa kwartaal of blauw pa henter un aña. Kiermen cu nan lo continua cu e mesun number di plachi cu nos ta uzando actualmente di 2015. Tin e posibilidad cu pa 2018 nan lo introduci otro tipo di plachi di miho calidad y mas safe pa no wordo falsifica.
