Boneiro: Un decada despues di 10-10-10

“Den un par di luna lo ta e decimo aniversario desde cu Bonaire a bira un municipio extraordinario di Hulanda. Maske e cantidad di protesta contra e cambio estatal a disminui, ainda tin borchi canto di caminda cu lema manera, ‘Stop apartheid Hulandes’.”

Esaki segun un articulo di Nathaly Evertsz-Ipcedencia den e portal Ret Karibense. Hunto cu su articulo e ta presenta un video den cual ta puntra ciudadanonan tocante  diferente experiencianan actual di Boneriano y Hulandes Europeo.

Boneriano Sharon de Palm ta haya cu tin mehoracion den cuido di salud y empleo na Boneiro, ademas cu pobresa tambe a pasa. El a bisa cu e desbentaha grandi ta cu e isla ta atrae mas turista, resaltando cu Hulanda ‘no tin comprension’ pa cultura Boneriano.

Otro Boneriano ta conta cu tin pobresa enorme na e isla, ademas di no tin suficiente empleo pa e habitantenan local. Specialmente e ta resalta un sentimento di trato desigual pa e Boneriano.

E sentimento aki ta resalta den ambos banda, profundisando desunion. Boneriano ta sinti su mes como un minoria riba su propio isla, mientras cu e Hulandes Europeo ta sinti rechaso. Aunke e respondientenan tabata cauteloso cu nan palabra, por a nota algun resentimiendo. “Mi a nace na Hulanda pero for di mi seis aa mi ‘taki. Toch nan ta bisa mi bay Hulanda back”, Therese Rosier a comenta den e video di Ret Karibense.

Grupo di protesta ‘Nos Ke Bonieur Bek’ tin añanan protestando e status di Boneiro como municipio di Hulanda, prefiriendo un status autonomo manera Corsou y St. Maarten. Esey lo nifica cu Bonaire por scoge un gobierno local.

Riba e fecha 10 di october 2010, Antia Hulandes a stop di existi como pais. E dia ey, Boneiro a bira un municipio extraordinario di Hulanda, hunto cu Saba y Sint Eustatius. E tres islanan aki ta forma Hulanda Caribense y tin un gezagheber y diputado, y por lo demas ta cay bou legislacion Hulandes. E aña aki ta cumpli un decada desde cu Boneiro a bira un parti di Hulanda.

Potret: Belkis Osepa