Segun resumen di ayera di Departamento di Salubridad Publico DVG pa e desaroyonan di pandemia di Covid-19 na Aruba, ayera tabatin 61 persona hospitalisa pa ricibi tratamento adicional pa e malesa causa pa e virus SARS-CoV-2.
Segun DVG a informa den su resumen, di e 61 persona cu ayera tabata interna den hospital, 49 tabata interna na Hospital Dr. Horacio Oduber. Di esakinan, 7 ta den Unidad di Cuido Intensivo ICU, 40 ta isola riba piso general, y dos riba piso di maternidad, esta hendenan muhe na estado. E otro 12 persona ta interna den ICU na Colombia.
Ademas, DVG a informa cu ayera tabatin 88 persona cu a recupera. A registra 105 caso nobo di Covid-19, di cual dos ta turista y 103 ta residente. E cifranan aki ta representa un tasa di positividad (‘positivity rate’) entre nos residentenan di 28 porciento. E cantidad di casonan activo ayera tabata 1043, y afortunadamente e cantidad di fayecido no a mira aumento.
Segun DVG, e datonan di Covid ta ilustra un aumento di casonan nobo, cu un averahe semanal di 118 caso pa dia y un averahe di tasa di positividad semanal di 29 porciento pa dia.
