Hues comisario a prolonga e detencion di minister Paul Croes y su chauffeur Roque Aparicio cu 60 dia mas. Un prome tratamento (pro forma) den e investigacion lo tuma luga den inicio di december 2017.
Esaki Ministerio Publico (OM) ta informa.
Hues comisario a dicidi di honra e peticion di fiscal pasobra e ta di opinion cu tin sospecho fuerte cu minister Croes a haci su mes culpabel pa echonan castigabel serio. E echonan aki ta inclui, soborno di oficial publico (pasivo), labamento di placa, apropiacion intencional, falsificacion di documento y traficacion humano. Pa loke ta e chauffeur, segun OM tin e sospecho fuerte cu el a haci su mes culpabel hunto cu sr. Croes di soborno pasivo y labamento di placa. Ambos sospechoso a wordo hiba bek pa KIA. Nan no mag di tin contacto cu ningun hende, menos nan abogado.
Mas mandatario bao investigacion?
E investigacion lo sigui, segun vocero di Ministerio Publico. E ekipo investigativo lo scucha mas testigo y sospechoso den e simannan venidero.
Bon Dia Aruba a puntra Ministerio Publico si e investigacion ta canando den un direccion cu otro mandatarionan lo mester bay bao investigacion. Esaki pa motibo cu e maneho di stranhero pa cu permisonan di labor etc, no tabata cay solamente bou sr. Croes pero ainda ta bou responsabilidad di minister Benny Sevinger. Y te awor gobierno no a inicia riba nan mes un investigacion den e operacion di e departamentonan concerni.
Den su contesta, OM ta referi nos na e contesta cu procurador general a duna riba mesun pregunta, cu e investigacion ta rond di minister Croes solamente. Nos a bolbe puntra OM esaki anto nan ta subraya cu esey ta cosnan cu nan no ta informa publico di antemano tocante di investigacionnan. OM: “Ibis tabata tin lunanan andando prome cu nos a cuminsa publica di dje.”
