Pasadia Briyo di Solo ta haci apelacion pa yudansa
Siman pasa tabata tin un candela cu a start na Pasadia Briyo di Solo na Piedra Plat. Tres localidad a kima y awor nan no por atende mas o menos 60 hende cu limitacion mental.
Siman pasa diahuebs atardi rond 6’or un candela a start na Pasadia Briyo di Solo na Piedra Plat. A bin constata cu e candela a cana basta lihe y kima 3 klas. Unidadnan di bombero a logra domina e candela rapidamente, sinembargo e candela a causa basta daño. E causa di e candela ainda no ta conoci, aparentemente el a cuminsa den cercania di un airco den un di e localidadnan.
Kico seguro ta cubri no ta conoci ainda tampoco, ta den proceso pa warda rapport di polis tambe cu ainda no a constata e causa.
60 cliente sin guia
Briyo di Solo ta un pasadia na Piedra Plat cu ta existi for di aña 1985. E ta un pasadia pa personanan cu limitacionnan mental for di 16 aña di edad bay ariba. Akinan nan ta haci un variedad di cos; traha den hardin, laba y dobla paña anto hopi otro actividadnan. E pasadia tin 60 cliente: cinco grupo di 12 cliente. Actualmente di esakinan tin 36 cu no tin caminda pa bin awor akinan y 24 cu nan por tin, pero ta opta pa no laga nan bin pa motibo cu e area ta actualmente hopi peligroso pa nan. E tres localidadnan kima ta habri, tin glas tur caminda y ta forma peliger pa nan pa motibo di nan curiosidad segun e cabesante. Actualmente e clientenan aki mester keda na cas, algun cerca nan mayornan of otro familiarnan cu ta wak pa nan. “Di esey nos ta sinti hopi fastioso, nos kier mas pronto posibel pa brinda nan necesidad ora nan bin akinan,” e cabesante Jeta Figaroa ta bisa nos casi cu lagrima na wowo. Tin 10 guia na e pasadia aki den e cinco gruponan.
Necesidad pa trailer y container
Ainda mester cera e area cu ta kima, pa nan por habri y sikiera atende algun di e clientenan sin cu ta forma peliger pa nan. Nan a haya bishita siman pasa di dos parlamentario (Clarisca Velasquez & Lorna Varlack di AVP) cu a bay wak e luga, Departamento di Asuntonan Social, y CEDE Aruba kende tambe a bay e luga mesora pa wak kico nan por yuda. Aeropuerto Reina Beatrix tambe ta bay yuda nan cu un donacion pa cuminsa cumpra material nobo. “Nos a haya hopi tipnan, pero ainda nos no a haya un trailer dispuesto pa bin akinan, anto container pa warda cosnan cu ainda por wordo drecha despues y wordo reuza,” Else van Homelen directora di Stichting voor Verstandelijk Gehandicapten Aruba (SVGA) ta bisa Bon Dia.
Nan ta conta nos cu cos ta canando y nan ta bishitando tur instancia y minister concerni, haciendo algo tur dia cu speransa pa yega na nan necesidadnan mas pronto cu ta posibel. Asina mes tambe nan ta haci un apelacion na comunidad pa cualkier forma di yudansa .
Por tuma contacto cu nan riba telefon 522-7858 of pasa personalmente na pasa dia Briyo di Solo na Piedra Plat 97-A entre 7.30 di mainta pa 4.30 di atardi.
