Ayera mainta Stichting voor Verstandelijk Gehandicapten Aruba (SVGA) a tene un conferencia di prensa en conexion cu nan 60 aña di existencia. Els van Homelen, General Manager di e fundacion, hunto cu Jacky Richardson, PR di e fundacion, a elabora ariba punto, entre otro retonan, e exitonan y tambe actividadnan pa nan celebracion di 60 aña di existencia.

Van Homelen a conta cu SVGA a wordo funda dia 9 di december 1964 door di meneer P. Harting, meneer A. de Vries y señora C. van den Berg na momento cu nan a ripara cu tabata hopi necesario pa Aruba tin un scol special, pasadianan pa mucha y adulto, centro pa train trabao y cas pa cuido 24/7 pa persona cu un discapacidad intelectual.

E fundacion a habri Pasadia Bibito Pin na aña 1973, na aña 1976 a habri Scol Dun’un Man a habri, na 1979 SVGA a habri un pasadia pa adulto na Brasil mainta y atardi den e edificio di scol dun’un man. Di eynan e fundacion a keda expande su capacidad pa brinda un miho servicio y di calidad na esnan cu tin mester di dje. Na e momentonan aki SVGA ta duna enseñansa, guia y/o cuido na alrededor di 250 cliente of alumno diariamente.

Van Homelen a remarca cu den transcurso di tempo SVGA a encontra algun reto y desde cu gobierno a cambia e forma di brinda subsidio na e fundacionnan na 2017, sin cu a caba di rond af e bevorderingen di hopi trahado cu a wordo pidi prome cu e cambio, e presupuesto no ta yega pa duna e cantidad y calidad di cuido cu nan kier brinda na nan clientenan.

“Gobierno, te awe, no a tene cuenta cu e suma di subsidio cu tin inflacion tampoco. Esaki lamentablemente a resulta den un reduccion di personal den cuido desde januari 2024 y un caso den corte contra gobierno,” el a señala.

Van Homelen a splica cu SVGA mester a lanta un caso contra Gobierno di Aruba pa motibo cu na mei di aña pasa, e fundacion a wordo informa for di Minister di Asuntonan Social y Husticia, Rocco Tjon, cu nan no lo paga e fundacion e suma di 815 mil florin cu tin den payback pa e trahadonan.

A pesar di esaki nan tin mente positivo ainda mirando cu na final di december aña pasa, e noticia cu SABA a ricibi pay back di 3.35 miyon di florin a duna nan speransa cu gobierno lo paga nan trahadonan tambe nan pay back. Mientras tanto, el a indica, nan ta warda decision di hues.

Otro reto cu el a menciona ta cu ta dificil pa haya specialista manera psicologo o ortopedagogo, y esaki ta hunga un rol pa motibo cu otro fundacionnan cu ta cay bao Ministerio di Salud por paga miho salario cu SVGA.

Van Homelen a indica cu pa clientenan cu ta mira cu no tin pasadia adecuado pa e adulto mayor cu un discapacidad intelectual na Aruba, esey ta haci’e dificil pa famianan mes wak pa e familiar y na su turno e peso riba e casnan manera Cas Sjabrururi y Stichting Ambiente Feliz ta bira mas.

“Tin mester mas trahado den e casnan pa por cumpli cu e necesidad di e habitantenan, y e trahadonan mester di habilidad nobo pa deal cu e problemanan fisico y psikico cu ta bin cu edad halto,” el a remarca.

Pero banda di e retonan, el a subraya, tin hopi exito tambe di e ultimo añanan. Algun exito ta inclui e fundacion a logra di habri e cas pa mucha y hoben, Cas Blenchi, cu fondonan di e “Sociaal Crises Plan Aruba” y metodo di “Disciplina Consciente” ta wordo usa den cas pa traha mas miho cu posibel na e desaroyo di e muchanan.

Cu fondonan di samenwerkende fondsen y hopi ayudo di comunidad SVGA a logra habri un camber pa cada habitante di Cas Sjabururi locual ta mehora e calidad di bida di e habitantenan substancialmente.

SVGA a cuminsa tambe un cooperacion exitoso cu Stichting Ambiente Feliz na Centro di Cuido na San Nicolas. Hunto nan ta maneha un pasadia pa muchanan cu discapacidad multiple pa esnan cu ta biba cerca nan mayornan y esnan cu ta biba den e casnan di Stichting Ambiente Feliz na Centro di Cuido.

Van Homelen a conta cu Scol Dun’un man a pasa den un trayecto hopi exitoso di mehora calidad door di implementa liñanan di siña y e metodo “Disciplina Consciente”. Ademas desde e aña aki tin un klas special pa vaknan creativo y desaroyo social-emocional y tin lesnan special pa haya conocemento di e mundo digital.

Tambe e scol a logra bin cu e producto di pesto di calidad halto cu ta rekeri plantacion y trabao di cushina di e alumnonan. Otro producto cu ta wordo produci na nan departamentonan como parti di e programa di e clientenan ta entre otro e bunita belanan di centro Man na Obra, y e dushi te di Pasadia Briyo di Solo.

Jacky Richardson a elabora ariba kico ta bay ta e actividadnan cu SVGA ta bay organisa pa celebra 60 aña di existencia. El a splica cu SVGA a forma un comision cu representantenan di casi tur departamento pa informa comunidad di e enseñansa, guia y cuido cu SVGA ta brinda.

E comision aki lo zorg pa mantene e pagina di Facebook di e fundacion actualisa cu informacion referente nan actividadnan y nan lo publica videonan regularmente pa informa y educa e comunidad di Aruba di e meta/servicio di cada departamento di SVGA.

Richardson a indica cu SVGA lo tin un open dag na luna di september pa henter comunidad di Aruba por wak kico tur nan ta ofrece pa personanan cu discapacidad intelectual. E fundacion ta bay organisa tambe un caminata pa henter comunidad participa hunto cu nan pa asina nan tin un actividad cu ta bon pa salud y tin integracion cu pueblo di Aruba.

“Nos ta gradici comunidad di Aruba di curason pa tur e apoyo durante e 60 aña di existencia di SVGA. Sin ayudo di comunidad nos no por a logra di ta unda nos ta awe. E confiansa di nos clientenan, alumnonan y nan famia den SVGA ta hopi importante pa nos. Nos ta gradici e esfuerso di tur trahado pa duna e miho di nan mes pa nos grupo meta tur dia. Nos ta gradici nos miembronan di directiva cu a haci un tremendo trabao durante tur e 60 aña y tur fundacion di Plataforma pa Persona cu un Limitacion pa traha hunto na un meta hopi importante, cu ta inclusion di persona cu un descapacidad den comunidad di Aruba y gobierno pa duna nos e fondonan pa haci nos trabao importante, aunke e fondonan no ta suficiente,” el a finalisa.