E investigado Mericano Raven Walker cu a bin realisando un serie di estudio dedica na e pisca invasivo Lion  fish den nos area marino a presenta su ultimo estudio bou e titulo: ‘Controlling Lionsfish: Survey data and a preliminary sustainable fishery model for Aruba’.

Sra. Walker di Texas A&M University at Galveston a bisa cu e pisca aki ta un especie invasor y logicamente ta dificil pa no bisa imposibel pa caba cu nan pero si controla su poblacion. Ya cu e presencia di Lions Fish ta genera no solamente un problema ecologico sino economico  y social debi nan su impacto den nos medio ambiente. Ya cu e Lions fish ta competi cu e djampou y pago  (grouper y snapper) pa recursonan  y e dos tipo di pisca aki tin gran importancia economico y social.

El a laga sa cu tin motibonan pa investiga e topico di Lion fish na Aruba, ya cu e ta un di e islanan  situa pa parti sur di Caribe y ademas un di e ultimo localidad caminda Lion fish a yega. E ta haya cu den nos caso masha poco tempo nos a haya pa pisca e Lion fish; y tampoco no tin literatura riba invasion di e pisca aki na Aruba. Solamente algun documento cu el a yega di publica hunto cu e biologo marino local, Byron Boekhoudt. E tipo di trabou aki e ta bin realisando hunto cu Castro Perez y demas boluntarionan di Aruba Reef Care y Santa Rosa Aruba.

Strategia pa  controla Lion fish
Den su charla cu a tuma luga na Holyday Inn hotel el a menciona algun strategia pa controla e poblacion di Lion fish den nos area marino. Un di nan ta e actividad di pisca nan locual ta tumando actualmente na Aruba. Tambe bin cu trampa specifico pa Lion fish. Tambe e conservacion y proteccion di dos pisca, esta tribon y djampou ya cu nan ta e gran predador di Lion fish. Te aworaki tribon ta consumi Lion fish ocasionalmente ta wordo spera cu si nos ta mantene e poblacion di tribon, nan lo yuda pa consumi Lion fish mas regularmente.

Tambe el a papia di control biologico, pa ehempel sterilisacion di Lion fish, pero mester sterilisa miyones di Lion fish pa asina nan por tin un influencia den nan poblacion.  Tambe el a papia di robotnan capaz di ataca e  Lion fish den awa profundo, pero e opcion aki ainda ta den nivel hopi experimental.  Otro posibilidad ta esun di introduci predador nan  nativo di Lion fish den nos lama; pero esaki lo por trece su risiconan ya cu nos lo introduci  mas especie invasor  cu lo por tin su impacto riba otro especie.

E investigado sra. Walker ta propone su proyecto di crea un modelo di piscamento di Lion Fish na Aruba cu ta sostenibel economico y ecologico. Kiermen mester pisca nan pero bou cierto control pa no afecta demasiado e piscanan nativo. Pero na e mesun tempo, no demasiado pa asina esun cu ta depende di e piscamento di Lion fish lo por tin suficiente na plaso largo. E ta haya cu esaki ta esaki lo ta e proposicion ideal.

Eliminacion
El a laga sa cu un proyecto similar na Bahamas a basa su mes  den calcula e poblacion di Lion fish pa area; y despues bin cu un proposicion di cuanto Lion fish mester elimina di un poblacion di 400 di nan pa area. Nan a recomenda pa elimina entre un 75%  te cu 95% di Lion fish pa area of zona pa yega na un balans ideal. Te ainda na Aruba no a wordo calcula e abundancia di Lion fish a base di datonan fisico.

E proposicion aki por ta uno realisabel ya cu durante un encuesta cu sra. Walker a realisa na 2014 a keda demostra cu  casi tur persona encuesta niun di nan a come Lion fish; pero nan ta dispuesto pa come nan. Esaki ta nifica –segun e investigado aki- cu ta existi un demanda pa consumi Lion fish localmente cu lo por yuda pa controla su poblacion y establece un fuente of base economico.

Aunke ainda no ta existi un calculacion riba e poblacion real di Lion fish. Sinembargo a base di tres tipo di habitat pa Lion fish a bin cu un aproximacion. Nan a calcula un porcentahe di cada habitat cu un map. Un abundancia halto di Lion fish lo ta 390 pisca/hectar. Un area mita ideal lo ta 100 pisca/ hectar; y un area baha y no ideal lo ta 10 pisca/hectar.  Teniendo na cuenta e tres suposicion aki nan ta calcula cu e poblacion di Lion fish ta alrededor di 167 lionfish/hectar. Un estudio na Corsou y Bonaire  a indica un densidad di 137 Lion fish/hectar.

6 kilo pa ora
Sra. Walker a mustra cu pa alcansa un poblacion optimal di 42 Lion fish/hectar  na Aruba, nos mester produci alrededor di 86 mil kilo di Lion fish pa aña, pisca den nos lama teritorial. Esaki  kiermen un indice di 6 kilo di Lion fish pisca pa un buceado pa ora.

Durante un torneo di Lion fish na 2014 a keda demostra cu te hasta 10 buceado lo por depende exclusivamente di e trabou di elimina Lion fish. E ta haya cu un esfuerso inicialmente mayor nos lo por logra un poblacion sostenibel di Lion fish den dos aña. Sinembargo el a laga sa cu un estudio realisa na Florida ta sugeri cu e nivel di experiencia di e buceado ta un factor cu mas ta influencia e cantidad di Lion fish elimina. Otro factor cu ta influencia e exito di  piscamento di Lion fish ta e tamaño di e pisca y den menor medida e temperatura di e awa.

Actualmente  sra. Walker ta recopilando un lista di especie di coral duro na Aruba, buceando hunto cu Byron Boekhoudt. Te aworaki e especie di e coralnan  observa pa sra.Walker na Aruba ta mustra cu nan ta  saludabel. Sin embargo, el a menciona e importancia di monitor na  largo plaso e situacion aki na Aruba. Ya cu esaki ta permiti di obtene mas data pa compara nan un aña cu otro; y asina compara si nan ta wak pa ehempel un reduccion den cierto especie di pisca den un aña pa  otro.