Un ekipo consistiendo di diferente instancia di cual entre otro Cuerpo Policial di Aruba, Aduana y Kustwacht hunto cu Afpakteam a haci inval na diferente cas diamars anochi di cual a conduci na 6 detencion.
Segun comunicado di Ministerio Publico (OM), na varios luga a haya un cantidad bastante grandi di fuel ilegal, cual a wordo tuma confisca. Tambe a confisca un speedboat go-fast y e tres vehiculonan cu tabata wordo uza den e contrabanda aki
“Contrabanda di fuel ta prohibi pa ley. Baha combustibel na canto, sigur cu e meta pa bende, ta un crimen. Desde corto e importacion di combustibel – otro cu na cantidad grandi – a wordo prohibi. Esaki ta dirigi riba particularmente cantidadnan chikito treci abordo”, segun OM.
E lucha di husticia contra e importacion, deposito y benta di fuel tin prioridad halto di Ministerio Publico y Afpakteam. E rason mas importante pa esaki ta e gran peligro cu traficacion ta trece cu ne pa personanan y propiedadnan. Den e ultimo lunanan por ehempel, a resulta cu un boto go-fast carga cu gasolin a coy candela riba lama grandi y a kima completamente. For di investigacion a resulta cu e fuel ta wordo transporta, baha, warda y bendi den nos bisindarionan ilegal y insigur. Ta papia pa su mes cu si un di e luganan aki den un vecindario yena cu cas, pega candela, e consecuencianan lo ta hopi grave, asina OM ta bisa.
“Un di dos motibo ta pa bringa competencia unfair. Fuel ilegal ta wordo bendi na un prijs mucho mas abao, loke ta haci competencia hopi dificil.”
