(AP) – Mas di 50 celebridad, escritor y productor a publica un verslag diamars defendiendo e icono nacional Gerard Depardieu den medio di critica cu ta aumenta pa cu su comportamentocu hende muhe durante su carera di 5 decada. Defensornan di victimanan di abuso sexual a expresa disgusto cu e sosten expresa pa Depardieu.

Depardieu a ricibi un acusacion preliminar di agresion sexual y violacion den aña 2020 despues di acusacion di actor Charlotte Arnould y a ser acusa pa mas di un decena di otro muhe di acoso, mishimento y agresion sexual. Depardieu a nenga cualkier eror y a yama verslag publica “hermoso.”

Publica diamars den LE Figaro, e tabata firma pa figuranan publico incluyendo ex Primera Dama y cantante Carla Bruni, Depardieu su ex pareha Carole Bousquet y actornan Pierre Richard, Charlotte Rampling y Victoria Abril. Dos decena di e 56 persona cu a firma tabata hende muhe. Varios ta di Depardieu su generacion, ken tin 74 aña di edad. Un documentario recien a trece dilanti acusacionnan di mal conducta sexual di 16 hende muhe contra Depardieu y a mustra e actor ta haci remarcanan y gestonan obsceno durante un biahe na aña 2018 na Nort Korea. E documentario a trece dilanti yamadonan pa stop di publica Depardieu su peliculanan, cual ta inclui clasiconan di cinema Frances moderno.

Den respuesta, diamars su publicacion a bisa “Nos no por permanece den silencio den bista di e acusacionnan den su contra, e cantidad di odio tira contra su personalidad. Ora cu Gerard Depardieu ta ser ataca di e manera aki, ta e arte (di cinema) ta ser ataca,” el a bisa. “Francia ta debe su persona hopi. Kita e actor inmenso aki lo ta un drama, un derota. E morto di arte. Nos arte.”

Legislador di Paris y feminista Raphaëlle Rémy-Leleu a bisa cu e personanan cu a firma ta experienciando un “negacion di realidad.” El a bisa cu e lo a preferi pa nan sostene iniciativanan contra violencia sexual na luga di esaki. “Nan ta nenga mira loke e homber aki a haci, pa motibo cu e ta un artista,” el a conta noticiero France-Info.

Emmanuelle Dancourt, ken su grupo #MeTooMedia ta sostene victimanan di mal conducta den e industria di media, a bisa riba television cu e publicacion su mensahe ta particularmente doloroso pa victimanan di abuso sexual di parti di hende homber poderoso. President Frances Emmanuel Macron tambe a genera ira ora cu el a bisa siman pasa cu Depardieu ta “haci Francia orguyoso.”

E documentario recien ta inclui un segmento unda por tende Depardieu ta haci un remarca sexual tocante un mucha hoben ta core cabay. France Televisions, cual a publica e documentario, despues a bisa cu e segmento aki a ser autentica pa un testigo cu a mira e grabacion sin edita.