Cuerpo Policial di Aruba a informa cu diadomingo ultimo, nan a detene 41 persona den e parada grandi di Carnaval y despues di control bao encargo di unidad motorisa riba caretera, a detene 13 persona mas.
Diadomingo pa exactamente 10or di mainta, SMAC conhuntamente cu KPA a haci inicio di parada grandi di Oranjestad unda tabatin 10 grupo y mas o menos 4300 participante.
Cuerpo Policial di Aruba a conta cu 230 personal riba pia di diferente departamento cu a traha hunto, entre otro Polis Uniforma, ME, Motor Unit, K-9, AE, Mobiel Commando, Flex team, Trafico, planologie, departamento di recherche, personal administrativo y tambe personal di CEA.
Pa 4:46 di atardi e cabes di e parada a yega ex-DOW y pa 8:33 di anochi e last lap a yega su final.
Pa 9:15 di anochi den Harbour Arena a kima e momo y asina Aruba a clausura Carnaval 70.
En total a detene 41 persona durante e parada. E detencionnan tabata entre otro bringamento, no sigui ordo di polis, buracheria, droga, arma blanco (cuchiu, bat baseball, skinops). Durante e detencionnan aki a topa cu un lighter parecido na un arma di candela. Aña 2023 tabatin 22 detencion.
13 persona deteni pa maneha bou influencia
Un biaha mas unidad motorisa tabata activo riba carteranan di Aruba cu control den trafico dirigi riba maneha bou influencia di alcohol.
A controla prome, durante y despues di parada grandi di Oranjestad.
Por a tuma nota cu a controla varios chauffeur y a detene den total di 13 persona, di cual 8 perde nan rijbewijs.
