Interes tabata grandi pa e di tres edicion di Finanzas Den Mi Hogar, e biaha aki na Oranjestad. Despues di 4 sesion cu a enfoca riba con pa maneha bo finanzas personal, e di tercer grupo di participante a ricibi nan certificado pa e curso Finanzas den mi Hogar. E proyecto Finanzas Den Mi Hogar a wordo organisa y financia door di Minister di Economia Minister Geoffrey Wever y desaroya y duna door di Fundacion Plan di Bida.

Un decision pa cumpra of spaar of ambos, tin un impacto riba bo cartera, awe y den futuro. Tur dia nos ta tuma decisionan cu ta afecta nos cartera. Awe bo por fia pa cumpra un wasmachine of realisa e biahe di bo soño pero cu e realidad cu tur luna y pa un periodo defini, un parti di bo budget ta bai pa paga e fiansa. E debe ta pone un presion extra tur luna riba bo cartera. E situacion lo bira preocupante si bo gastonan ta mas hopi cu bo entrada. Un sondeo di Banco Central di Aruba “The Financial Wellbeing Household Survey 2021” ta indica cu na Aruba 3 for di 10 hogar ta gasta mas di nan entrada tur luna. E desaroyo preocupante aki ta mustra e necesidad di brinda mas informacion con pa maneha nos cartera mas consciente.

Finanzas den mi Hogar ta un curso di educacion financiero cu ta consisti di 4 sesion cu tema manera con pa spaar, kico lo pasa ora no por paga debe mas, e importancia di tin meta den bida y kico ta e distincion entre luho y prioridad segun bo entrada. E curso lo wordo duna den tur districto. E prome curso a tuma lugar Paradera, despues na San Nicolas y awor tabata e turno pa e tercer grupo di ciudadano ricibi nan certificado den districto di Oranjestad.

Minister Geoffrey Wever ta gradici cada ciudadano cu nan participacion, un participacion cu sigur lo contribui na nan desaroyo y bienestar personal y ta gradici Fundacion Plan di Bida pa e manera excellente cu nan a duna e curso aki.

“E interes y participacion di nos ciudadanonan na e cursonan ta mustra cu educacion financiero ta importante y un necesidad y ta p’esey tambe mi maneho ta pa ofrece esaki gratis na tur participantenan y asina duna un apoyo grandi na nan desaroyo y desaroyo di nos comunidad y pais”, segun minister Geoffrey Wever.