Un programador di computer Frances a transferi mas di $500mil den Bitcoin na activistanan ultraderechista na Merca poco prome cu su morto luna pasa, incluyendo algun involucra den e accion na US Capitol siman pasa, investigadonan a bisa ayera.
Chainalysis, un compania cu ta investiga transaccionnan di Bitcoin, a haya cu mayoria di e 22 transaccion dia 8 di december ultimo a bay pa Nick Fuentes, un influencer kende tabata den e multitud na Washington pero a nenga di tabata parti di e multitud cu a invadi e Capitol.
E Frances di 35 aña di edad kende a transferi e placa a post un nota di suicidio riba su blog e siguiente dia, bisando cu e tabata cronicamente enfero y tabata kier laga su rikesa na ‘cierto causa y persona’.
Chainalysis no a revela identidad di e homber. Door di trace e stapnan di e investigadonan, un periodista di Ap a haya su blog y nota di suicidio. Un funeraria a publica su obituario, incluyendo informacion di entiero,pero despues a elimina esaki; ainda por haya un version cached riba internet.
Investigadonan federal na Merca ta investigando posibel ‘coordinacion y planeamento’ prome cu e accion na e Capitol, y ta usando un variedad di metodo cu ta lansa rutinariamente den investigacionnan criminal, incluyendo examina transaccionnan financiero y datonan di celular y biahe.
Michael Sherwin, fiscal Mericano na Washington, a bisa cu investigadonan tambe tabata examinando si tabatin algun ‘comando y control’ y a priminti pa trece cargonan si fiscalnan por proba un conspiracion. No a presenta cargonan di conspiracion te awo.
Investigadonan financiero Frances a nenga di duna comentario.
E investigacion di Chainalysis a haya cu e Frances a manda 28.15 Bitcoin, na balor di alrededor di $522mil, na 22 adres, incluyendo hopi pertenciendo na activista- y organisacionnan ultraderechista Mericano. Fuentes a ricibi alrededor di $250mil. Otro recipientenan a inclui un organisacion anti-inmigracion, un streamer di alt-right, y un cantidad di adres no identifica.
“E donacion, como tambe reportenan di e planeamento cu a bay den e accion na Capitol riba canalnan di comunicacion alt-right, tambe ta sugeri cu gruponan extremista domestico por ta miho organisa y funda cu a kere anteriormente”, e investigadonan a skirbi.
