Un gran preocupacion ta existi cerca e usuarionan di Yahoo rond mundo, entre nan esunnan di Aruba. Mas di 500 miyon di cuenta di su usuarionan a wordo horta na final di aña 2014. Un echo aki a tuma luga casi dos aña pasa, pero te awor el a sali den luz publico.
Expertonan ta bisa cu esaki por trata di e echo mas grandi cu e hackernan a yega di realisa ni sikiera compara cu WikiLeaks. Si mester compra e situacion cu a presenta cu WikiLeaks cu a afecta 117 miyon cuenta compara cu 500 miyon aki ta un diferencia hopi grandi. Na cuminsamento di e aña aki a anuncia cu mas of menos 160 cuenta di e red My Space tambe a bira victima di e hackernan.
E hortamento di datonan informatico ta inclui nombernan, cuentanan di e-mail, fechanan di nacemento, numbernan di telefon y den algun caso e preguntanan di siguridad, segun e mesun compania a informa. Di acuerdo na un experto den siguridad cibernetico di Noruega e robo aki lo tin consecuencianan pa hopi tempo largo.
E pregunta cu ta den cabes di hopi usuario di Yahoo ta con pa nan haya sa si nan cuenta a wordo ataca. Segun Sr. Andres Velasquez kende ta un specialista den delitonan di informatica na Latino America, den e caso aki mester supone lo pio. Si nos tabatin of tin ainda un cuenta den Yahoo, mester asumi cu e informacion di nomber, password, username, telefon etc., ya por ta plama den internet sea pasobra nan a bende of nan a publica esaki.
Tin un website www.haveibeenpwned.com unda bo por drenta y busca sea e nomber di e cuenta of pa e username si ta existi un data base cu a wordo ataca. Esey ta un manera, pero ta bon pa e usuario di Yahoo no descarta e cu su cuenta eventualmente a wordo ataca. E consecuencianan ta basta grandi. Mas ainda e ta bira si e persona normalmente ta haci uzo di e mesun password pa drenta na otro servicionan, loke por duna e hackernan mas acceso na nan informacion priva.
Consehonan
Sr. Velasquez, a laga sa den CNN na Spaño cu un 82% di e usuarionan no ta cambia nan password regularmente. Nan ta uza e mesun password pa drenta den hopi otro servicio, y esaki ta algo hopi importante cu mester tene cuenta cu ne.
Segun experto aki, un tema hopi relevante ta e preguntanan di siguridad cu diferente programa ta haci den caso cu nos ta lubida nos password, nos por contesta e preguntanan aki pa drenta nos cuenta bek. Aworaki tur hende ta contesta e sorto di preguntanan aki cu contesta real. Sin embargo nos mester contesta di un moda cu e ta real pero cu no ta asina obvio. Por ehempel dilanti e pregunta unda bo a nace mester contesta por ehempel na “Happy Island”, enbes di contesta na Aruba. Mester pensa mas riba e contestanan di siguridad. Ta bon pa pone den nan un elemento cu nos ta recorda pero cu no ta un contesta real y logico, pasobra loke a pasa e atake di e hackernan di Yahoo aki tin hopi mas informacion cerca nan di loke nos ta kere.
No tin nada sigur cu Yahoo lo implementa algun accion di siguridad. Pero mester corda cu e hortamento di datonan aki a sosode na final di 2014, y te awor aki e informacion a wordo conoci. Y ta pa e motibo aki, e parti preventivo pa e usuario cambia e password constantemente ta importante. No uza e mesun password pa otronan website of servicio via internet. Esaki ta algo sumamente importante pa nos mes siguridad como usuario di e servicionan di internet. Ta berdad cu e companianan grandi ta pone sistemanan di siguridad, pero nos mes tin un rol importante den e caso aki.
Yahoo ta den proceso di wordo cumpra of ricibi un oferta pa e compania Verizon. E parti di e accion of shares ta bay tin repercusion pa via di e situacion aki. Igualmente Yahoo lo mester reacciona si nan a tene cuenta cu legislacion Mericano pa atende cu e sorto di atakenan aki. Ya cu nan mester a informa cu tempo, pero lastimamente esaki a sosode na e momento menos ideal pa Yahoo.
