Miles di Ruso a presenta pa e entiero dialuna di cinco ingeniero nuclear Ruso, kende a fayece durante un explosion mientras nan tabata test un motor di raket nobo, un tragedia cu a lanta miedo pa radiacion y preguntanan tocante un programa secreto di arma.
E ingenieronan, kende a fayece diahuebs, a keda dera dialuna na Sarov, cede di e centro di investigacion nuclear principal di Rusia, unda nan tabata traha.
Ministerio di Defensa inicialmente a reporta cu e explosion den e area di test di marina cerca di e pueblo di Nyonoksa, den e region di Arkhangelsk, a mata dos persona y herida seis otro. E corporacion nuclear Rosatom, controla pa e estado, a bisa despues durante weekend cu e explosion tambe a costa bida di cinco trahado y a herida tres mas. No ta conoci e cantidad total di persona afecta.
E compania a bisa cu e victimanan tabata riba un plataforma riba lama, tabata test un motor di raket, y a ser lansa den lama pa e explosion. Director di Rosatom, Alexei Likhachev, a elogia e victimanan como ‘heroenan berdadero’ y ‘orguyo di nos pais’.
“Nos trabou riba armanan cu nos sigur lo completa, lo ta e miho tributo pa nan”, Likhachev a bisa durante e entiero. “Nos lo completa e orden di nos Madre Patria y proteha su siguridad completamente.”
Rosatom a bisa cu e explosion a tuma luga mientras e ingenieronan tabata test ‘un fuente di energia nuclear isotope’ pa un motor di raket. Autoridadnan local na Severodvinsk, un ciudad cercano di 183,000 habitante, a reporta un aumento di nivel di radiacion poco despues di e explosion, pero a bisa cu no ta presenta riesgo pa salud.
Sinembargo, e declaracion di administracion di Severodvinsk a yega net ora Ministerio di Defensa a insisti cu no a libera radiacion, algo cu a recorda intentonan den era Sovietico pa tapa catastrofe. Residentenan spanta a core cumpra iodide, cu por yuda limita e daño di exposicion pa radiacion.
Despues di e explosion, autoridadnan Ruso tambe a cera parti di Dvina Bay pa barco pa un luna, den locual por ta un intento pa preveni stranheronan di mira un operacion pa recupera restonan di misil.
Ministerio di Defensa ni Rosatom a menciona e tipo di raket cu a explota durante e test. Sinembargo, e mencion di Rosatom di un ‘fuente di energia nuclear isotope’ a pone media Ruso conclui cu e tabata e Burevestnik (Petrel), un misil crucero nuclear, revela pa prome biaha pa presidente Vladimir Putin na maart 2018.
