Gobernador Fredis Refunjol, su ultimo biaha como gobernador, a otorga 5 Arubano un Condecoracion Real, manera di custumber den cuadro di e celebracion di Aña di Rey. Aki bou por lesa e detayenan di e 5 persona condecora. E informacion ta distribui pa e Oficina di Gobernador.
Sr. F.N. Dijkhoff
Sr. Dijkhoff a haya su condecoracion pa su contribucion grandi riba tereno di deporte di futbol na Aruba.
Durante hopi tempo e la traha na bienestar di comunidad di Aruba y ta stimula otronan pa haci mescos. Desde 1999 e ta activo como referee di futbol y como Match Commissioner y despues di sigui cursonan di FIFA e la fungi como referee di futbol na diferente competencia internacional den region. Sr. Dijkhoff ta tanto activo den maneho di Arubaanse Voetbalbond como tambe den Scheidsrechtercommissie. Desde 2003 te cu awor e ta instructor di referee y duna les na e generacion nobo di referee
Sr. D.G. Figaroa
Sr. Figaroa ta ricibi su condecoracion pa su logronan riba tereno di deporte y su esfuerso durante hopi tempo pa comunidad di Aruba en general. Desde 1986 Sr. Figaroa ta activo den diferente funcion den maneho di Sport Vereniging Volvox. E ta fungi ademas como trainer/coach di diferente team di volleyball y ta desde 2011 tesorero di Arubaanse Volleybalbond. Sr. Figaroa ta desde 2000 activo como assistent lider di e grupo di baile folklorico Grupo di Baile Folklorico Santa Cruz y ta organisa presentacion na institucionnan. Tambe e ta activo den maneho di Preparacion Matrimonial y ta activo como entrenador di team di hubentud di basketbalvereniging SV Estrella.
Sr. J.P. Ras
Sr. Ras ta ricibi su condecoracion pa su esfuersonan durante hopi tempo na bienestar di comunidad y pa stimula otronan riba tereno di bienestar y di bida eclesiastico. Sr. Ras ta desde 1990 activo como boluntario na cas di cuido Huize Maris Stella na Savaneta unda e ta yuda e personanan cu ta biba na Maris Stella cu diferente trabou y ta apoya nan y organisa diferente actividad pa nan. Desde 2005 Sr. Ras ta activo como boluntario na Parokia Sagrado Curason na Savaneta. E ta miembro di Legion di Maria y ta activo den maneho y mantenemento di e Misa y hardin di Parokia y ta bati e bel di e misa.
Sr. N.F. Sprok
Sr. Sprok ta ricibi su condecoracion pa su esfuersonan durante hopi tempo na bienestar di comunidad y pa stimula otronan riba tereno cultura Arubano.
Desde 1990 Sr. Sprok ta dedica su mes na toca y restaura e instrumento musical Caha di Orgel. Un instrumento cu tabata menasa di bay perdi. Sr. Sprok a promove musica di Caha di Orgel cu su Caha di Orgel na diferente luga na Aruba. Tambe a promove musica Caha di Orgel den exterior y a regala un caha di Orgel na Bonaire.
E la graba diferente cd cu su Caha di Orgel y ta organisa desde 2011 e festival Caha di Orgel. Door di e actividadnan aki, Sr. Sprok ta duna un contribucion grandi na mantene e tradicion Arubano di toca Caha di Orgel. Sr. Sprok ya a haya diferente reconocimento pa su importancia pa cultura di Aruba y na 2014 e caya unda e ta biba a wordo nombra den su honor: Caya Nelson Florencio Sprok.
Sra. M.A. Maduro-Tromp
Sra. M.A. Tromp ta ricibi su condecoracion pa su esfuersonan durante hopi tempo na bienestar di comunidad Arubano unda e ta stimula otronan.
Desde 2001 e ta activo como boluntario na Fundacion Telefon pa Hubentud Aruba. Den su funcion como telefonista y consehera na e organisacion e ta brinda oido na muchanan cu ta yama y ta duna nan ayudo y si ta necesario ta dirigi nan na e instancia corecto. Banda di e trabounan aki Sra. Maduro-Tromp den pasado a haci diferente trabou boluntario entre otro como dirigente di e Coro Santa Ana y lider di Grupo di Baile Flor di Kibrahacha. E trabounan e la combina cu trabou di cuida su mama cu tabata rekeri un cuido intensivo..
