E tres Venezolano cu a drenta Excelsior Casino riba 26 october 2015 a haya un sentencia awe mainta di 5 aña prizon. Un otro sospechoso Rubiano F.A.C. (26) a haya un castigo di prison incondicional di 18 luna, di cual 6 ta condicional, pa posesion di arma. Ministerio Publico ta considerando pa bay den apelacion contra e ultimo sentencia aki, asina nan ta informa.
Aki bou e relato di prensa completo di Ministerio Publico:
Corte den Prome Instancia a dicta sentencia awe den un caso cu a causa gran conmocion den comunidad di Aruba, esta, e atraco violento riba Excelsior Casino.
Mainta tempran riba 26 di oktober 2015, tres homber arma a drenta Excelsior Casino y a menaza, dal y horta e trahadornan cu na e momento ey tabata ainda na pia di trabao. E caso a sacudi Aruba y a causa susto y inseguridad na hende. Riba prome di november 2015, e prome tres sospechosonan a wordo deteni pa Polis. Den e dianan y simannan cu a sigui cuatro otro sospechoso mas a wordo deteni, y e luna aki e ultimo sospechoso, e homber R.A.B. (29) a keda deteni. En total e caso tin ocho sospechoso.
E caso contra e tres sospechosonan V.J.G. (54), A.E.A. (40) y B. a wordo posponi y ta planea pa sigui riba 27 di mei 2016.
Awe Corte a dicta sentencia den e casonan contra cuatro sospechoso.
E sospechosonan C.J.H.I. (34), V.M.V.A. (25) y J.C.G.C.d.V. (26), tur di nan Venezolano, a wordo condena pa un castigo di prison incondicional di 5 ana. Un di e consideraciónnan di Corte ora di tuma e decisión tocante e castigo aki, tabata cu e sospechosonan aki, djis pa nan saca probecho financiero, a comete un atraco masha serio y violento, cu a causa hopi miedo y sufrimento cerca e victimanan, y cu por a ocasiona daño grandi na e imagen di Aruba como destinación turístico safe.
E sospechoso F.A.C. (26) a wordo condena pa un castigo di prison incondicional di 18 luna, di cual 6 ta condicional, pa posesion di arma. Ministerio Publico ta considerando pa bay den apelacion contra e ultimo sentencia aki.
