Ayera den reunion publico a wordo trata e ley di presupuesto complementario, prome cu parlamento a baha cu reces den cuadro di dianan di fiesta venidero di Pasco y Fin di Aña. Un presupuesto complementario cu a keda aproba, pero sin sosten di e fraccion di oposicion. Na final di e votacion, presidente di parlamento Juan Thijsen a desea su coleganan feliz Pasco y Bon Aña 2020.

Cada minister di e gabinete Wever-Croes a purba di duna contesta na e preguntanan formula pa e miembronan di nos organo legislativo, sinembargo nan no tabata suficiente pa e fraccion di oposicion AVP. E biaha aki prome minister, Evelyn Wever-Croes mester a responsabilisa su mes pa e cartera di ex minister Otmar Oduber.

Mocion no aproba.
Di tur manera e reunion no a bay sin cu no tabatin cuestionamento y tiramento di palabra entre e fraccionnan di coalicion di gobierno y fraccion di oposicion. Specialmente cu oposicion tabata haya cu mayoria di nan pregunta no a haya contesta.

Un punto cu a resalta tabata un mocion tocante maneho financiero di Serlimar pa bin cu un investigacion tocante esaki via Contraloria General, sinembargo no a keda aproba.

Parlamentario independiente Daphne Lejuez a lamenta cu e fraccion di coalicion no a sostene e mocion aki, mirando cu ta net mas placa a wordo pidi pa Serlimar den e presupuesto complementario aki cu un suma di 3.2 miyon florin.

El a haya cu independiente cu premier Wever-Croes a bisa cu lo realisa e investigacion aki, Lejuez a lamenta cu como organo legislativo, parlamento no a sostene e mocion pa pidi un investigacion.

Minister di Finansa.
E presupuesto complementario aki tin algun cambio cu mester a wordo haci, pero e ta keda e mesun suma, asina minister di Finansa y Economia, Xiomara Ruiz-Maduro a yega di bisa.

Recientemente e mandatario a bin parlamento pa asina nan indica den un nota di fin di aña, kico ta e cambionan cu por wordo premira den e presupuesto 2019. Y e cambionan aki a wordo concretisa pa medio di apoderacion di parlamento ayera cu aprobacion di e presupuesto complementario.

Minister Ruiz-Maduro a declara cu enbes cu tin un buraco di 25 miyon di locual a wordo premira -segun e normanan acorda cu Hulanda- awe pa loke ta deficit di presupuesto di pais Aruba hunto cu e resultado di e sector colectivo, locual ta premira pa cumpli cu e norma di e ley di supervision financiero, ta menos. Den esaki gobierno ta mira cu nan ta yegando na un suma di 24 miyon di deficit, segun e mandatario.

El a expresa su orguyo pa e logro financiero aki, ya cu esaki ta refleha un disciplina cu nan ta bin implementa for di aña pasa. “Nos a demostra un disciplina financiero grandi,” el a bisa.

Panorama financiero.
Pa ilustra esaki, minister Ruiz-Maduro a presenta un panorama den cifranan di e desaroyo financiero di pais Aruba durante e delaster 5 aña.

El a bisa cu na 2014 pais Aruba tabatin un deficit cu tabata core den 444 miyon florin. Na 2015 e tabata 168 miyon, y un presupuesto complementario sin cambionan. Na 2016 a bira 103.1 miyon florin y 2017 a bira 24.7 pero cu un presupuesto complementario cu a bira 154.6 miyon. El a bisa cu e aña ey cu nan a drenta gobierno, nan a bin haya un buraco extra di 130 miyon florin. Na 2018 nan a premira 149.9 miyon cu a keda e mesun suma ora cu nan a presenta nan presupuesto complementario. Pa 2019 nan a presenta un presupuesto cu un deficit di 24.8 miyon, y ayera un presupuesto complementario cu e mesun suma.

Durante su presentacion na Parlamento, minister Ruiz-Maduro a bisa cu na november ultimo cu nan a bin parlamento cu e nota di fin di aña. E ta algo cu nan ta bin presenta hustamente pa duna parlamento informacion den mas ocasion riba e situacion financiero di pais Aruba.

E biaha ey nan por a anticipa ariba e cambionan cu a wordo trata ayera. Pero tambe na luna di augustus gobierno a bin parlamento pa asina den mita di aña, e organo legislativo por a haya un bista riba ehecucion y implementacion di presupuesto 2019.

El a bisa cu na mita di aña caba, parlamento por a mira cu gobierno tabata kedando den cual tabata e apoderacion di parlamento. El a reitera cu ayera cu nan a trata e presupuesto completario, e no ta un diferencia di locual ya caba nan a yega di mustra di e comportacion riba e presupuesto aproba pa 2019. “Den e nota di fin di aña nos a mustra tambe den cifra cu gobierno ta kedando den locual ta e apoderacion,” el a bisa.

El a agrega cu te hasta el a bay mas miho cu loke a wordo premira pa locual ta e norma cu mester cumpli cune den cuadro di e protocol forma cu Hulanda. Ya cu e ta casi bira un presupuesto balansa.