47.5% di turistanan bayendo Colombia pa salud ta bin di Caribe Hulandes

Colombia a bira un destinacion importante pa loke ta trata turismo di salud den nos region, asina director di ProColombia encarga cu e area di Caribe, sr. Carlos González a declara na Bon Dia Aruba. ProColombia ta e instancia di gobierno di Colombia encarga cu inversion, exportacion, turismo y marca pais di Colombia.

E ehecutivo importante di ProColombia a laga sa cu Colombia a bira un destino di salud masha reconoci na nivel LATAM. Esaki danki na nan instalacion medico di vanguardia y uzo di tecnologia avansa, prijs accesibel, atencion personalisa. Tur e factornan aki ta haci cu Colombia a bira e destino ideal pa tratamento relaciona cu salud, prevencion y rehabilitacion.

El a declara cu Colombia ta pionero den creacion di sistema propio di acreditacion di salud cu a contribui mundialmente den e desaroyo riba tereno di salud manera e valvula di Hakim cu a wordo crea pa tratamento di malesanan cu ta afecta e cerebro. Sr. González a bisa cu ProColombia ta traha conhuntamente cu e clinicanan y entidadnan di salud previamente registra cerca nan cu ta cumpli cu standard di calidad halto y reconocimento nacional y internacional.

Caribe Hulandes

Durante un entrevista cu e matutino aki, sr. González a destaca e importancia cu Caribe tin pa Colombia su servicio di salud. Pero no solamente di Caribe, pero di otro region di henter mundo. Na 2015 compara cu aña anterior a wordo raporta un crecemento di un 6% di e biaheronan internacional cu a bishita Colombia pa procedemento medico.

Na 2015 un total di 10.423 persona a bishita e pais Latino Americano aki pa busca servicio di salud den diferente area specialisa manera medicina curativo, preventivo, estetica y bienestar. E cifra aki lo por ta mas grandi pero algun di e bishitantenan ta prefera di abstene nan mes di bisa cual ta e motibo di nan bishita na Colombia.

Esaki ta e caso di e bishitantenan Caribense cu ta bay Colombia, mayoria di nan ta habitantenan di e islanan di Reino Hulandes. Segun nan calculo un total di 4.953 biahero di e islanan di Reino Hulandes a bishita Colombia pa tratamento medico. E cifra aki ta un 47.5% di e total di bishitante internacional cu Colombia ta ricibi di turismo medico. E fluho di bishitante aki a wordo facilita ya cu Colombia a mehora substancialmente nan conexion cu nos region Caribense, segun sr. González. Nan tin 61 vuelo directo pa siman ya sea fei di Aruba, Corsou, Bonaire, Republica Dominicana, Puerto Rico y Cuba. Companianan aereo manera LAN, Avianca, Copa Airlines y Insel a percura pa conecta Caribe cu Colombia.

ProColombia a coordina cu operadonan di turismo pa ofrece pakete “all inclusive” di salud fei Aruba pa Colombia. Nan operadonan di turismo den Caribe a cuminsa comercialisa e tipo di pakete aki pa control medico ehecutivo y procedemento no invasivo den institucionnan di salud mas representativo.

Calidad y prijs competitivo
Un 90% di e instancia di salud cu ta traha internacionalmente cu ProColombia ta pertenece na e sector di medicina curativo, manera: tratamento contra cancer, cirugia cardio-vascular, malesa di stoma, diabetes, etc… Tambe medicina preventivo manera control ehecutivo di salud, odontologia, oftalmologia, etc…

Actualmente nan clinicanan y hospitalnan ta trahando pa obtene nan acreditacion mundial evalua pa instancia prestigioso manera Joint Commission International (JCI) cu ta traha cu normanan di calidad halto. Ta asina cu e pais Colombia tin 22 hospital entre e 43 hospitalnan mas miho na Latino America, segun ranking di e revista America Economia.

Ademas di calidad pa loke ta prijs, sr. Gonzalez a informa cu nan ta ofrece prijsnan masha competitivo compara cu Merca. Un tratamento medico na Colombia lo por costa entre 25% y un 40% mas economico segun e tipo di procedemento medico cu na Merca.