Oficial di e ciudad a pidi disculpa na lider musulman despues cu Polis a cuminsa tira riba un moskee y na hende para eynan cu ‘water cannon’ mientras tabata purbando di dispersa un demostracion pro-democracia.

Lider di e ciudad y hefe ehecutivo, Carrie Lam hunto cu Hefe di Polis a bishita Kowloon moskee pa pidi dispensa na e hefe imam y e comunidad musulman. Segun lider di e moskee a bisa reportero cu polis a pidi dispensa.

“Nos moskee no ta daña, nada malo a wordo haci. Unico cos ta cu oficial no mester a haci’e. Nan a pidi dispensa y nos ta acepta esey”, Saeed Uddin a bisa, kende ta Secretario honorario di comunidad Islamico di Hong Kong.

Durante e protesta, polis a uza truck yena cu awa y a pasa dilanti e moskee tirando awa riba esunnan cu tabata para dilanti di e heki di e moskee, segun un video di e incidente filma pa un legislado pro-democratico, Jeremy Tam.

Tambe ta mustra con dilanti e trapi, e heki di metal y pafo tabata mancha cu e likido blauw. Hende e keda choca y tosa purbando di kita e likido for di nan wowo. Boluntario a yega despues pa haci limpi.

Autoridad di Hong Kong a purba di minimalisa locual a pasa, unda cu manifestante ta bisa cu ta un ehempel di polis uzando tactica no necesario contra manifestantenan. Hong Kong ta cas pa mas di 300.000 musulman segun e Islamic Community Fund, kende ta encarga cu 5 moskee y 2 santana musulman.