Parlamentario Endy Croes (MEP): Mientras CAFT kier Hulanda duna aanwijzing…

‘5 sindicato a entrega un carta reclamando 28.8 miyon na indexering’

ORANJESTAD – Parlamentario Endy Croes a splica cu Aruba ta pasando den hopi problema. E problema mas grandi ta e desaster cu AVP y Mike Eman a laga atras. Den 8 aña di gobernacion, Eman a crea debenan astronomico cu deficitnan sumamante grandi, unda a redobla e debe nacional di pais Aruba.

Croes ta ilustra cu den e ‘Annual Statistical Digest’ di Banco Central, cual henter pueblo y tambe sindicatonan por lesa cu ta obtenibel online riba e website di Banco Central di Aruba, por mira con Eman y AVP a endeuda e pais aki te na su strop. Un pais casi casi bancarota.

Deficitnan astronomico y cruel, 2010-2017.
Mi ta skirbi e deficitnan redacta den dicho rapport di e temporada di 8 aña di Eman y AVP. Aña 2010 (188.6 miyon), 2011 (325.2 miyon), 2012 (443.3 miyon), 2013 (332.8 miyon), 2014 (405.8 miyon, famoso aña di e KB), 2015 (184.6 miyon, aña cu ley di LAFT y CAFT a drenta na vigor), 2016 (183.7 miyon), 2017 (132.4 miyon). Esaki ta suma un total di 2000 y 200 miyon florin esta 2.2 biyon na debe cu Eman a ocasiona redoblando e debe di e 23 añanan prome cu su tempo. Papiamento crioyo, crueldad ta locual Eman a haci. Gobierno actual a logra cera aña 2018 cu un deficit di 45.2 miyon y e aña aki e deficit lo ta solamente 25 miyon mientras mira pa 2020 Aruba lo bay conoce un surplus di 25 miyon lagando atras e desaster di Mike y finalmente ora tin Surplus por cuminsa paga e debe di Eman y AVP.

Ningun protesta di sindicatonan.
Croes ta splica cu tur empleado tin derecho democratico pa bringa pa su bienestar. Locual ta hopi preocupante cu hustamente awor cu Minister Presidente na timon di e barco aki ta nabegando sacando Aruba poco poco for di e abismo di Mike, nos ta tuma nota cu sindicatonan a haya ta bon hustamente awor pa bin dilanti reclamando 3.6% na indexering cual ta igual na 28.8 miyon florin. Croes no ta contra pa ambtenaarnan bringa pa cualkier derecho pero ta husto si pa tene cuenta cu e situacion financiero di pais Aruba. Durante 8 aña di Eman y AVP inflacion averahe a subi cu 4.2%, pero no a tende ningun sindicato reclama nan derecho. Tampoco a scucha e sindicatonan protesta contra e deroche di placa sin fin serafin. Banda di esaki Mike a laga atras 232 miyon cu pais Aruba mester paga solamente na interes pa aña y un otro 80.9 miyon florin cu mester paga pa 20 aña largo na e proyectonan PPP cu no tabata presupuesta.

Awe cu tin un protocol cu Hulanda unda gastonan di personal mester alcansa 479 miyon cu ta 6 miyon menos cu 2018 y alabes un Hulanda menasando cu un aanwijzing pasobra den Crisis Social Plan tin 1.4 miyon na salario di profesionalnan y Hulanda kier mira esaki inclui den e 479 miyon di personeelskosten, sindicatonan ta haya ta ok pa cuminsa e proceso pa pidi pais 28.8 miyon florin na indexering. Croes ta bisa cu lo corecto ta pa dialoga pero lo corecto ta honesto tambe cu bo mes y cu e futuro di nos propio yiunan. ‘Timing’ den bida ta lo corecto. Pueblo por saca su propio conclusion si esaki ta hustifica na e momentonan aki, Croes ta termina bisando.