Awe mainta minister di Infrastructura, Otmar Oduber den compañia di director di DOW, Marlon Croes y un di e rumannan Lejuez kende ta doño di e marca I Love Aruba a anuncia cu e borchi cu e marca aki dilanti di bestuurskantoor ta wordo move pa e asina yama Welcome Plaza dilanti di e waf di crucero.

Despues cu a permanece pa 8 aña dilanti di bestuurskantoor e trabou di mudamento ta cuminsa awe y e instalacion di e borchi den su localidad nobo lo keda cla aki 3 siman.
E mandatario a argumenta cu e motibo di e decision aki tin di haber cu e trabou di renobacion di otro parti di bestuurkantoor ta biniendo cla. Y considerando cu e ta un edificio monumental -segun ley- e mester ta visibel y e sing tabata obstrui e vision ey. Pesey nan a yega na un entendimento cu e doñonan di e borchi pa move pa otro sitio.

Mientras cu un di e rumannan Lejuez cu ta representa e marca I Love Aruba a bisa cu nan a yega na un entendimento ‘win-win.’ Tambe cu e borchi lo wordo modernisa caminda e por wordo mira y saca potretnan di tur dos banda. Ademas e sitio lo ta bon ilumina y bon ubica cu lo facilita saca potret anochi y lo facilita e acceso na dje.
Director di DOW a bisa cu e borchi aki lo permanece den e sitio aki pa basta tempo te desaroyo di futuro lo decidi otro. Mayor exigencia no tabatin sino esun di iluminacion y mehoracion di e borchi.