Autoridad di Panama a deporta of expulsa 425 stranhero entre januari y mei cu a pasa, pa comete ‘falta migratorio’. Mayoria di ciudadano ta di Colombia, Cuba, Venezuela, Nicaragua y China.
Cifra di Servicio Nacional di Migracion (SNM) di Panama cu a ser publica ta bisa cu den prome 5 luna di 2017, 297 stranhero a ser deporta y 128 a wordo expulsa di e pais di manera definitivo y permanente.”
Entre hende deporta of expulsa tin Colombiano (131), Cubano (87), Venezolano (36), Nicaraguense (29), Chines (25), Ecuatoriano (22), Dominicano (22). Tambe 11 Mexicano, 10 Pakistani, 7 Hondureño, 5 Brasileño, 5 Salvadoreño, 5 Guatemalteco, 4 Peruano, 3 Mericano, 3 Jamaiquino, 3 Checo, 2 Canades, 2 Haitiano, 2 di Kosova, entre otro nacionalidad.
Entre e faltanan migratorio cu autoridad a tuma como causa pa deportacion ta: cu nan a drenta na Panama di manera ilegal (230), menasa pa seguridad colectivo (89), of pasobra nan a cumpli caba cu nan castigo di prizon na e sistema penitenciario di Panama (46).
Tambe algun otro causa manera cana sin ningun papel di identificacion (23), of purba di daña seguridad publico (17), cay den conducta di baho moral (12), traha sin visa cu nan mester tin (8).
Servicio Nacional di Migracion a bisa tambe cu algun hende ta bay boluntariamente bek na nan pais, manera ta sucede cu hende di Nicaragua (475), Colombiano (209), Venezolano (149), Dominicano (66), Hondureño (25), Cubano (21), Chines (19) y Salvadoreño (16).
31 di mei ultimo a pasa un decreto na Panama cu a reduci e cantidad di dia di estadia pa turista for di Colombia, Venezuela y Nicaragua. E medida aki ta bin pa motibo cu ciudadano stranhero por permanece ilegal na Panama, autoridad a splica.
Agobado Gilberto Cruz a pone un demanda cerca tribunal supremo di Panama, dia 5 di juni contra e decreto aki, pasobra e ta considera esaki inconstitucional. Cruz a bisa cu e ta un decreto discriminatorio y mester aplica mesun medidanan pa otro nacionalidad tambe.
E decreto oficial ta bisa cu reducion di tempo di estadia di ciudadano di Colombia, Venezuela y Nicaragua ta un respuesta cu a bin pa motibo di hopi stranhero cu ta drenta como turista y cu despues nan lo ta cuminsa haci actividad diferente na nan status di turista, lubidando asina pa haci e cambio di categoria migratorio”.
Panama ta un di e destinonan mas solicita pa hopi migrante di e region, pa su bon situacion economico, social y politico. Panama ta un destino eligi principalmente pa Venezolano, Colombiano y Centroamericano.
Na Panama a yega tambe ciudadano di otro 51 pais amigo, entre nan Mericano y Europeo, cu ta beneficia bao un decreto ehecutivo di aña 2013 cu no ta reciproco, pero cu si ta duna bentaha migratorio pa nan ciudadano, ora cu ta duna visa di trabao pa nan tambe.
