Diahuebs ultimo durante un update duna na Parlamento riba e situacion actual di Covid-19, minister di Salubridad Publico, Dangui Oduber, a referi riba e acceso cu Aruba lo por tin na e vacuna anti-Covid.
E mandatario a laga sa cu ya caba via Hulanda, Aruba ta den e lista di paisnan cu lo beneficia di e vacuna aki. Pero ainda mester discuti cu Hulanda e cantidad di vacuna disponibel pa nos poblacion. E canal di noticia A24 (América 24) a yega di informa cu e consorcio Hulanda, Alemania, Francia y Italia lo pidi inicialmente un cantidad di 400 miyon di vacuna.
A24, un canal di television abierto di noticia Argentino, a informa cu ya caba, ora cu e vacuna di Oxford bin cla – eventualmente prome cu fin di aña – e politica di distribucion di e vacuna ta practicamente defini. Aunke ainda nan meter traha riba algun detaye.
Dia 20 di juli ultimo bao e titulo: “La vacuna de Oxford funciona,” nan a informa cu Merca ya a aporta mil miyon dollar na AstraZeneca pa sigura e prome 300 miyon di dosis. E gobierno Britanico a aporta pa 100 miyon di dosis. E consorcio Hulanda, Alemania, Francia y Italia a reserva 400 miyon di dosis.
Tin tres vacuna basta adelanta, entre nan Moderna (Merca), Pfizer (Alemania) y esun di universidad di Oxford cu ta esun mas prometedor. Ya cu hopi ta sigura den mundo cientifico cu entre september y fin di aña lo ta den su fase final.
Entre laboratorio AstraZeneca y Universidad di Oxford tin un acuerdo pa produci un lote inicial di 2 mil miyon di dosis. E vacuna aki ya caba ta den su fase 3 despues cu a demostra cu e ta produci respuesta immuun of anticurpa of cel T cu por combati e coronavirus den ser humano. Na America Latino e vacuna aki lo wordo produci y distribui na Argentina y Mexico.
Vacuna pa Aruba
Minister Dangui Oduber el a laga sa cu durante e ultimo reunion cu nan tabatin cu PAHO, gobierno di Aruba a wordo informa cu tin 6 vacuna den e ultimo fase di desaroyo y nan ta conseha pais Aruba pa haci un pre-ordo caba di e vacuna.
Aruba no a tuma e decision pa haci e pedido ainda. Nan ta den contacto cu gobierno Hulandes, ya cu den e ultimo reunion sosteni cu Secretario di Estado, Raymond Knops riba e topico di e vacuna, a wordo bisa cu Aruba lo uni cu gobierno di Hulanda ora cu nan ta haci nan pedido na Union Europeo.
Minister Dangui Oduber a agrega cu Hulanda tampoco tin claridad ainda ki dia e vacuna aki ta bira disponibel. Aruba ta hayando informacion diariamente for di Organisacion Mundial di Salud (WHO) y di RIVM di Hulanda. Sinembargo, segun gobierno Hulandes, e vacuna Europeo lo bin riba mercado mas lihe cu cualkier otro vacuna. Ademas nan ta considera cu esaki lo ta e vacuna mas confiabel.
Na momento cu esaki ta bira disponibel, gobierno Hulandes lo manda un pedido di vacuna pa e islanan di Reino Hulandes tambe. El a sigura cu e cantidad cu ta bira disponibel pa Aruba ainda mester wordo discuti cu Hulanda. Mirando cu ya caba a wordo divulga cu Hulanda, Alemania, Francia y Italia lo pidi inicialmente un cantidad di 400 miyon di vacuna, eventualmente cada pais lo haya un cantidad di 100 miyon vacuna.
