‘Trayecto Siña Traha’ ta un proyecto bandera cu fundacion Reclassering cu ayudo di OAA ta ehecuta y cu despues di un periodo di incertidumbre riba su futuro a keda rescata, a lo menos pa un aña mas. 

Gobierno a tum’e na su encargo y nan ta continua cu e proyecto aki,  ya cu Reclassering poco poco lo sali for di dje, ya cu mayoria di hobennan cu ta participa no a cay cera. Nan a cuminsa cu e proyecto, ya cu nan a mira un necesidad pa bin cu esaki. Pero mirando cu e ta proyecto ta bayendo stabiel y gobierno a tum’e bek, Reclassering su rol ta bay bira menos den dje.
Asina e ta duna e hobennan mas chens pasobra e echo cu Reclassering a carg’e, nan ta pensa cu ta pa clientenan di e fundacion aki cu ta atende cu hobennan cu a cay cera of cu a confronta problema cu husticia.  E proyecto aki ta uno preventivo pa evita cu hoben cu no ta bayendo scol y cu no ta trahando, ya sea recidivista of no, lo por sigui un estudio cu lo por brind’e e posibilidad di traha.

Inscripcion
Shinuska Albertus  kende ta encarga cu e proyecto aki na fundacion Reclassering ta declara na Bon Dia Aruba cu ainda e posibilidad ta habri pa e hobennan cu lo desea di sigui cuater curso cu nan ta ofreciendo actualmente: Assistent pa Mantencion;  Assistent pa Mecanico; Assistent pa Empleado Comercial y Assistent di Cuido. Nan a bin cu e delaster curso nobo, specialmente pa e hende muhe oportunidad riba e area ey, y nan tin e oportunidad pa por inscribi tambe. E ta un proyecto pa hoben entre 16 cu 25 aña cu no a caba su scol secundario y cu no tin trabou. Di e forma aki nan ta ofrece e hoben aki un oportunidad pa nan por caba nan scol y tambe drenta den e mercado laboral.

Aunke siman pasa nan a cuminsa cu e proyecto aki, e posibilidad t’ey pa esunnan ainda interesa pa forma parti di dje. Ya un grupo di 40 hoben a cuminsa cu nan estudio, 15 hoben cu ta femenino y 25 hoben cu ta masculino. Nan edad promedio ta entre 17 pa 18 aña, y mayoria di nan, nan ultimo trayectorio escolar tabata na nivel di EPB. Nan tin un promedio entre 1 pa 2 aña cu nan no ta bay scol of cu nan a drop out. E grupo aki tin 15 hoben cu ta mayor caba, kiermen cu nan tin yiu caba.

Proyecto y drop out
Na inicio a inscribi 74 hoben locual ta refleha cu e proyecto aki ta un necesidad pa nos hobennan mas vulnerabel. E grupo aki mester pasa pa seis siman largo un trayecto di prome unda nan  a haya diferente training manera di comunicacion, con pa anda cu rabia pa asina Reclassering por wak e motivacion di e hobennan mes cu e proyecto aki. Sra. Albertus ta bisa cu tabatin diferente motibo pakico di e grupo di 74 cu a inscribi a keda 40 di nan so. Un di nan tin di haber cu un grupo di nan a haya trabou caba prome cu a cuminsa cu e trayecto aki. Tambe tabatin hobennan cu a dicidi haci algo otro y tambe hobennan cu definitivamente no tabata motiva pa sigui.

E ta pone accento cu e proyecto aki ta pa hoben den edad menciona ariba y pa full na Aruba. E ta habri tambe pa e hobennan cu no a cay cu problema cu husticia y esun cu a confronta problema cu husticia. Gran parti di e hobennan cu ta participa den e proyecto aki ta hobennan cu pa un of otro motibo no ta bayendo scol of nan no a cana nan scol.

Directora di Reclassering, Seraida Pemberton ta mira importancia di e proyecto aki mirando e gran demanda di hoben interesa den e proyecto aki cada aña cu nan ta bin cu ne. E ta refleha cu ta existi un gran cantidad di hoben cu no a bin cla cu un scol secundario na Aruba, y e proyecto aki ta duna nan chens pa nan por logra algo den nan bida.