Ayera den oranan di atardi, diferente preguntanan a bin dilanti door di algun usuarionan di rednan social pa loke ta trata e noticia cu na Parlamento di Aruba a pone un mashin pa swipe y asina por tin acceso pa drenta den Parlamento.

Asina a informa presidente di parlamento Edgar Vrolijk den un entrevista duna na e medio local 24ora, unda cu el a splica cu lo ta un swipe digital cu pa dia 1 di februari e mester ta in place.

Na e momentonan aki nan ta terminando e contract cu e compania na unda cu no a duna detayenan di ki compania ta, esaki ta un di e preguntanan cu comunidad a trece dilanti, ken ta esunnan cu a haci e trabou di instalacion di e sistema aki.

Den mesun rosea, el a sigura cu ta esunnan cu ta encarga cu control y siguridad esun cu a dicidi pa implementa esaki, unda cu el a aclaria cu “a mi como voorzitter, a mi no tin nada di haber den dje”, Vrolijk a expresa.

E motibo cu segun Vrolijk a menciona pa introduci esaki ta pa “nos tin cu stop di keda wak spirito, esey ta e problema cu nos tin, cu nos ta wak hopi spirito, ta net esnan cu ta grita spirito ta esunnan cu semper ta den contra di proceso di innovacion y mehoracion, nos tin cu laga old school un banda…”, el a bisa.

Pa por drenta Cocolishi of Bestuurskantoor tambe mester di un carchi pa swipe y por drenta den diferente oficinanan di gobierno na unda cu el a sigura cu “esaki no ta nada nobo, nos ta implement’e y ta algo cu tin 40.000 florin inverti den dje, desde 2015 nan a cuminsa e proceso, no ta a mi a cuminsa cune” Vrolijk a enfatisa.

Tocante esaki, tambe usuarionan di rednan social a puntra si na e momentonan aki cu Aruba ta den un crisis financiero e gasto aki tabata necesario y prioritario.

Presidente di Parlamento di Aruba na aña 2015 tabata Marisol Lopez-Tromp cu awor ta lider di fraccion di partido MAS den parlamento, na 2017 Mervin Wyatt-Ras a continua cu e proceso cu despues Juan “Ady” Thijsen a implementa cierto cosnan pero awor e decision a bin pa caba di implementa e sistema aki, Vrolijk a señala cu esey si el a haci hunto cu e trahadonan y cu despues nan a aproba e parti final.

Igualmente el a sigura cu conhuntamente cu esaki tur cos ta regula pa drenta eynan, tur hende tin nan acceso pa drenta pa asina por tin mas siguridad, “pasobra aworaki cu yabi, ken cu ta por drenta y e no ta garantisa siguridad na ningun hende akiden”, Vrolijk a declara.

El a trece dilanti cu den pasado, ora un parlamentario caba su ciclo den parlamento nan no ta entrega e yabi back “e ta keda un peliger y cada bes bo tin cu cambia e lock y aworaki den caso aki, bo ta stop pa parlamentario, ta stop bo acceso tambe y bo no por drenta akiden mas”, el a finalisa.