Gobernador di departamento di Cauca (sur oeste), Oscar Campo a confirma cu 4 persona entre nan un bebe, a muri na municipio Corinto, como consecuencia di un crecida di riu La Paila.
“Te na momento aki, tin cuatro persona cu a muri”, segun Campo a informa. Autoridad tin 18 hende cu a disparce y 26 mas cu ta lesiona.
E suceso a cuminsa diaranson cerca di 6 ora atardi, momento cu un awasero a produci e crecida di riu La Paila, y e awa a drenta na varios cas di e municipio aki, cu tin como 32 mil habitantenan. Awa a destrui hopi zona pober tambe.
E gobernante a bisa cu e riu a destrui cerca di 37 cas, pero e cantidad
no ta definitivo pa e gran cantidad di awa cu a drenta na bario, miho conoci como La Colombiano, La Playa y Esmeralda, Carrizales, Pedregal y El Tablón.
Ekipo di rescate a cuminsa cu nan trabou desde tempran, pa asina purba di haya e hende cu ta disparce. Nan ta purba di avansa den nan trabao di limpiesa di localidad di Corinto.
Den labor di rescate ta traha grupo di militarnan di ehercito, polis, defensa civil na trabou di limpieza y duna hopi yuda pa tur hende cu ta damnifica, pa asina purba di recupera nan ekipo y obhetonan cu famianan tabatin den nan cas, y cu awor ta yen di escombro y desperdicio.
Segun cruz cora di Colombia, como 256 persona ta haya atencion medico na un stadion deportivo, caminda nan a ser hiba pa atencion medico.
Presidente di Colombia, Juan Manuel Santos, a haci un yamado pa tur poblacion pa purba di sigui tur recomendacion, dilanti di temporada di awasero cu ta cay riba varios zona di Colombia.
