Ayera 4 di october Aruba y mundo ta conmemora Dia Mundial di Bestia. Na aña 1929 dia 4 di october a ser declara como e Dia Mundial di Bestia pa iniciativa di e Organisacion Mundial di Proteccion di Animal den e congreso celebra na Viena. Ariba e fecha aki ta celebra e bida animal den cualkier di su formanan.

Na Aruba no ta un secreto cu tin un problema pa loke ta trata maltrato di bestia, specialmente maltrato di cacho y pushi, como tambe un problema grandi pa loke ta trata cacho y pushi riba caya.

Den luna di september Bon Dia Aruba a publica un articulo tocante un caso lamentabel di un cacho cu sintomanan di abandono, na unda su situacion a bira mas complica debi na tur e carpata cu e tabatin tanto den su horeanan como den parti di su curpa.

E caso cu a keda publica pa Luna Foundation a haya hopi atencion online y ta un muestra cu e situacion pa loke ta e problema di maltrato y abandono di cacho riba caya na e isla ta basta grandi.

Centro di Control di Cacho (CCC) ta e organisacion cu ta yuda pa alivia e molester cu e cachonan riba caya por causa na ciudadanonan. Ayera e organisacion a publica un video ariba nan pagina di Facebook, en conexion cu Dia Mundial di Bestia, y a informa tocante nan proposito y con nan, hunto cu comunidad, por yuda den e solucion pa e problematica aki.

Nathy Ventura, administrado di CCC, a splica den e video cu oficialmente CCC ta e deposito di KPA y BCI ora cu nan tuma un cacho den beslag for di cierto situacionnan, sea ta riba caya of for di man di un doño iresponsabel cu no por cuida su mascota.

Ventura a recorda comunidad ariba e Ley di Cacho, cu tey pa proteha e animalnan aki y na mesun momento el a urgi e doñonan di bestia pa ta doñonan responsabel, provee pa nan mascota manera deber ser y den caso cu tin problema cu e bestia, por acerca e centro pa informacion.

El a subraya tambe e trend cu tin den e ultimo tempo cual ta ‘dumping’ di cacho of pushi na e portanan di e centro. ‘Dumping’ ta un trend cu ta sucede no solamente dilanti e portanan di e centro, pero otro camindanan rond di e isla y ta un problema cu creciendo den comunidad.

Ventura ta enfatisa cu pa por tin un solucion pa e problema di cachonan riba caya y maltrato di cacho, comunidad mester uni na e lucha y ta consciente.

Ayera tambe Minister di Transporte, Integridad, Naturalesa y Asuntonan di Adulto Mayor, Ursell Arends, a lansa un campaña di conscientisacion, conhuntamente cu CCC, relaciona cu cuido responsabel di mascota.

A traves di e comunicado Minister Arends a splica cu durante e campaña aki lo bay duna hopi informacion ariba diferente topico manera Ley di cacho, cuido di salud di mascota, sterilisacion, microchip, eutanasia y tambe informacion di e fundacionnan cu ta traha na bienestar di e bestianan.

El a remarca cu durante ultimo añanan por a observa un crecemento di e cantidad di cacho y pushi riba caya y cu e causa di e problematica aki ta e doñonan di mascota iresponsabel cu ta busca cacho y pushi sin tin e manera pa cuida nan pa despues bandona nan pa nan cuenta ariba caya.

“Cacho y pushi ta animalnan domestico cu ta depende 100% di nan doño y ora cu bo ta bandona nan, nan ta biba un bida cruel cu hopi dolor y sufrimento. Ademas cu nan ta sufri nan lo bay reproduci y esaki ta caminda nos ta awe. Cu un problematica cu ta afectando nos tur ariba e isla aki, e ta importante pa nos realisa cu un cambio di mentalidad so nos por yega na un impacto positivo pa alivia e situacion cu nos tin actual,” el a señala.

E mandatario a subraya cu na Aruba tin hopi fundacion cu ta haci e trabao pa rescata animal riba caya tur dia, pero despues di hopi aña di rescata animal di caya, aworaki mayoria a yega nan capacidad maximo. Un punto cu e diferente fundacionnan a resalta na varios ocasion.

A pesar di e trabao cu e fundacionnan ta haci pa yuda y rescata e bestianan for di riba caya, Minister Arends a indica, e hendenan local mes no ta adopta frecuentemente for di un fundacion y como resultado tur fundacion ta keda cu mayoria cacho of pushi cu nan ta rescata. E consecuencia di esaki por ser mira recientemente na unda hopi fundacion a pone un stop temporal pa tuma mas animal bao di nan cuido.

“Prome cu bo busca un cacho of pushi haci bo mes e pregunta aki: Ami ta un doño di mascota responsabel? Mi por dun’e cuminda y awa limpi tur dia? Mi tin un cura y cas cu e ta keda safe? Mi por paga pa su cuido di salud tur luna? Mi por paga pa sterilisa y microchip? Si bo contesta ta un SI na e preguntanan aki e ora bo ta un doño di mascota responsabel,” el a enfatisa.

Den e ultimo simannan Cuerpo Policial di Aruba ta eherciendo controlnan severo den diferente bario pa loke ta trata e cachonan riba caya y den cura, y a parti boet, di suma halto, na e doñonan di mascota iresponsabel.

KPA a informa recientemente cu durante e ultimo siman e accion di control a tuma lugar den algun den districto di Noord como tambe districto di Oranjestad. Nan a tuma nota di varios infraccion pero a logra atende cu un total di 54 persona of doñonan tocante diferente infraccion di ley di cacho.

E personanan aki no a tuma precaucion suficiente pa asina e cacho por ta bon cuida. Un total di 21 persona a haya un multa mesora y 32 persona a haya un aviso. E avisonan cu a ser duna ta pa cachonan neglisha y cachonan riba caminda publico, entre otro. KPA a resalta cu mayoria doñonan y of esnan responsabel pa cu e cacho no a wordo encontra na cas na momento di e control.