Esaki ta un fecha cu ta promovi for di 4 di october di 1929 pa Organisacion Mundial di Proteccion Animal cu e obhetivo di stop e extincion di hopi especie cu ta existi rond di mundo. Igualmente redactor di Bon Dia Aruba kier a dedica e articulo aki na e compañero masha lief y alabes esun di mas jaloers na cas, Bromie.

E dia aki a wordo eligi specificamente pa coincidi cu e santo di e bestianan cu ta San Francisco di Asis, ken den su bida a considera cu tur ser cu ta habita mundo ta criaturanan di Dios.

Na aña 1980, Papa Juan Pablo 2 a declara San Francisco di Asis patrono di bestianan, un accion cu a bira e celebracion aki mas popular, pa motibo cu pa cada aña, miyones di catolico ta uni cu nan bestia den misanan pa nan ricibi e “Bendicion di Mascotanan”.

E declaracion Universal di Derechonan di Bestianan a wordo proclama dia 15 di october di 1978 y a wordo aproba pa Nacionnan Uni, e declaracion aki ta establece cu tur bestia tin derechonan y ta señala cu e no conocemento di e derechonan aki a conduci y ta sigui conduci na e homber pa comete crimen contra naturalesa y contra bestianan.

E intencion di celebra e Dia Mundial di Bestianan ta pa recorda nos cu aunke nos ta e especie cu mas evolucion, esey no ta kita e derechonan y proteccion na tur e otro bestianan di e planeta.

Pasobra tur hende ta forma parti di un cadena conoci como e ciclo di bida y destruccion di cualkier especie ta genera dañonan grandi den naturalesa.

Aunke ayera tabata 4 di october, ainda tin chens di celebra e dia aki unda ta respeta tur e sernan bibo cu ta biba cu nos den mundo aki, tambe realisando of participando den actividadnan educativo pa promove e generacionnan mas hoben e interes sano pa e bestianan.

Tambe, por comparti diferente mensahenan pa sensibilisa y conscientisa e otro usuarionan di internet tocante e sernan cu lana of cu halanan, cu ta biba rond di nos pero cu nan no ta conta cu un dispositivo manera nos, pa lanta nan voz na fabor di nan derechonan.

Pero, tin tur sentido di celebra e dia aki cada aña, pa motibo cu 40% di tur especie di bestia rond di mundo ta core peliger di extincion, principalmente pa causanan humano. Tin un miyon especie den peliger di extincion.

Ademas, di iniciativa di Dia Mundial di Bestianan, tambe ta existi otro proyectonan orienta na e proteccion di bestianan, por ehemplo, na e momentonan aki, ta existi 3 Obhetivo di Desaroyonan Sostenibel di ONU cu ta enfoca riba proteccion di bestianan, specificamente obhetivo 13 cu ta trata di ‘Accion pa e Clima’, obhetivo 14 tocante ‘Bida Submarino’ y obhetivo 15 ‘Bida di Ecosistema Terestre’.

Cu esakinan, ONU ta propone conscientisa e diferente gobiernonan di mundo y e poblacion den general cu e obhetivo di haya un compromiso general pa cuida e especienan y dana nan ecosistema pa nan por sigui biba.

Awor si, ban cu e parti mas espera, den e relato aki nos ta papia di un cacho masha lief pero alabes esun di mas jaloers cu por existi, “Bromie” e cual su nomber a bin for di un “Brownie” pa su color bruin, pero su doño di tres aña no por a pronuncia su nomber bon pa loke a bira “Bromie”.

El a yega na nos cas na final di aña 2020, ora tabata un baby di dos luna cu tabata drumi den nos cama door cu “realmente tabata un baby” pero den transcurso di dianan, el a cuminsa haci un tiki mala mucha y a wordo manda na e sala cu tur su coy di hunga pa por adapta na su espacio nobo cu awor ta su cas.

Bromie ta un cacho di rasa Chihuahua cu ora e ta scucha un zonido straño e ta sali y bay busca kico e zonido ey ta, pero su balentia no ta dura hopi.

Tambe e ta gusta drumi hopi specialmente riba su doño ora tin e chens di haci’e, su doño cu awor tin cinco aña ta mucho pendiente di dje y ta pone su awa y su cuminda tur anochi pa e por keda trankil.

Aunke e no ta un cacho cu ta sali mucho den caya door cu e ta custuma mas di biba paden, e ta gusta bay keiro cu tiki nervio y ta blaf si ta wak cu un hende ta acerca su doño sin permiso di dje, pasobra e ta un cacho hopi lief, hopi inkieto, pero tambe e ta e defensor di su doño.