Ayera 4 di december a celebra Dia Mundial di Braille, e metodo universal pa personanan cu limitacion visual severo of cu ta ciego por usa pa lesa y skirbi.
Braille ta un representacion tactil di simbolonan di alfabet y number cu ta usa seis punto pa representa cada letter y number, y incluso simbolonan musical, matematico y cientifico. Braille, yama asina pa su inventor den e siglo 19 na Francia, Louis Braille.
Riba 4 di januari, Dia Mundial di Braille, ta celebra en realidad di cumpleaños di Louis Braille, ken cu 3 tres aña a keda ciego accidentalmente. Na edad di 15 aña el a crea un set di simbolonan a traves di puntonan cu papel. E puntonan por a wordo sinti facilmente cu man y asina facilita pa hasta e persona ciego pa skirbi y lesa.
Aunke e sistema tabata hopi util pa personanan cu discapacidad visual, tabata dos aña despues di e fayecimento di Braille na 1854 cu su scol a adopta e sistema. Poco despues di esaki, e sistema a bira hopi popular na e resto di Francia, pero a pesar di esaki e integracion di e sistema na otro paisnan si a bay di un manera hopi slow.
E Dia Mundial di Braille ta wordo celebra tur aña pa reconoce e esfuersonan di Louis Braille. Su creacion simpel, pero efectivo, a haci posibel cu e hendenan ciego por a siña lesa y skirbi. E dia aki ta uno relativamente poco conoci, pero pa persona cu ta traha pa yuda e hendenan ciego y esnan cu ta visualmente incapacita, e ta un dia cu hopi significado.
Den actualidad tin competencianan ta wordo organisa pa persona ciego y tambe ta crea consenshi ariba tecnologianan nobo cu tin pa yuda sigui innova e lenguahe di Braille. Por ehempel, den pasado e persona ciego mester a usa un mashin special pa por skirbi cu Braille, pero awendia tin computernan cu ta ekipa pa esaki.
Varios organisacion rond mundo ta probecha e Dia Mundial di Braille a yuda esnan cu discapacidad visual y pa crea conscientisacion ariba e importancia di e dia, y lenguahe, aki.
