Te dialuna mainta, 395 solicitud di companianan di construccion y personanan natural a drenta na DOW pa reinicia cu nan proyecto di construccion, despues cu gobierno a decreta e shelter in place.
Director di DOW, Marlon Croes a bisa cu su departamento a keda encarga di parti di minister di Infrastructura y minister di Husticia pa realisa e trabao aki. E sector di construccion a cay den e prome nivel di flexibilisacion cu a cuminsa dia 4 di mei ultimo pa reactiva nos economia na Aruba.
Actualmente nan a logra controla 114 peticion, 16 a wordo manda bek pa motibo cu e informacion no tabata completo. Mientras 157 peticion a wordo firma, autorisa y duna 158. Na momento di haya aprobacion di bo solicitud na DOW bo por cuminsa traha. E aprobacion aki ta inclui e reglanan of protocol di higiena y distanciamento fisico/social cu tur compania mester cumpli cune.
Den e prome nivel aki solamente ta wordo permiti 15 persona na pia di trabao pa cada proyecto simultaneamente.
Director di DOW a indica cu un 60% di e proyectonan ta trata di construccion, 20% construccion comercial y otro 20% ta trata di mantencion relaciona cu companianan cu ta encarga cu instalacion y mantencion di airco, corta yerba, verf, etc…
DOW lo ta na haltura di tur e trabao cu ta bay reanuda y esun cu kier registra mester haci esaki via nan website: www.dow.aw. Eynan bo ta haya e link pa procesa tur informacion rekeri, entre nan: Registro di Camara di Comercio, proyecto pa ehecuta, lista di nomber di empleadonan, persoonsnummer, etc. Nan mester ta inscribi na AZV, SVB, DIMP y DAO.
Un suplica director di DOW a haci na e contratistanan y persona natural pa corda yena tur informacion completo pa facilita e trabao pa procesa e solicitud lihe. Si e solicitud ta carece di tur informacion exigi, nan tin cu mand’e bek of gewoon rechas’e.
