(AP) – Un accidente entre un bus di pasahero y un truck diasabra trempan a causa e fayecimento di 38 persona riba caretera di Minas Gerais, un estado na Brazil, segun e oficialnan a informa.
Departamento di bombero di Minas Gerais, cual a responde na e alerta, a bisa cu 13 otro persona a ser hiba hospital cercano na Teofilo Otono. E bus aparentemente a sali for di Sao Paulo y tabata cargando 45 pasahero.
Autoridadnan a bisa diasabra atardi cu tur victima a ser saca for di e sitio y un investigacion lo determina e causa di e accidente. Testigonan a conta e ekiponan di rescate cu un taira di e bus a splota, causando cu e chauffeur a perde control y choca contra e truck. Otronan a bisa cu un bloki a dal e bus, segun e departamento.
Un vehiculo cu 3 pasahero tambe a accidenta contra e bus sinembargo tur 3 a sobrevivi.
Gobernador Romeu Zema a skirbi riba X cu el a duna otro pa un “mobilisacion completo” di e gobierno di Minas Gerais pa asisti e victimanan.
“Nos ta trahando pa garantisa cu e famia di e victimanan tin e sosten pa enfrenta e tragedia aki den un di e maneranan mas humano posibel, specialmente considerando cu esaki ta sucede net prome cu Pasco,” Zema a informa.
Brazil su presidente Luiz Inacio Lula da Silva a bisa den un declaracion diasabra cu oficialnan federal tabata bao disposicion di Minas Gerais. “Mi ta lamenta profundamente e perdida y ta manda mi oracionnan na e famianan di mas di 30 fayecido for di e accidente na Teofilo Otoni, Minas Gerais. Mi ta resa pa e recuperacion di e sobrevivientenan di e tragedia teribel aki,” Lula comenta.
