35 aña di Clinica di Dialyse

Ayera Clinica di Dialyse (Dialyze Kliniek) na Dr. Horacio Oduber Hospital a celebra su 35 aña di existencia. A tene un celebracion dilanti di e edificio, unda cu diferente persona a wordo invita. Director Financiero di HOH, Teo de Kool como tambe Minister di Salubridad Dr. Alex Schwengle a hiba palabra, unda cu nan a felicita tur trahado di e departamento.

Na 1981 cu e clinica di Dialyse a wordo funda, unda cu tabata tin dokternan manera Wever, Anaya y Falconi, kendenan a traha duro pe Dialyze Centre y pe ta manera cu e ta awendia, segun Minister Schwengle. “E importancia di e 35 aña ta cu awo nos kier duna un servicio necesario, unda cu ta haya pashentnan cu nan riñon no ta funciona bon mas y cu si nan por haya e servicio aki na Aruba, nan no mester bay afo manera antes,” el a indica.

Ta di hopi importancia cu por duna servicio di dialyse na Aruba, cual ta haci cu e pashentnan no mester bay otro pais. Cu esaki por mantene e pashent na bida pasobra si nan no haya dialyse bo lo por fayece.

Un otro aspecto pa tene cuenta den e celebracion di 35 aña ta pa gradici esunnan cu ta haci e trabao aki, entre specialista, dokter, enfermero, assistent, tecnico, secretarianan y tur esunnan cu ta yuda mantene e luga.

Un otro punto importante ta cu kier bay pone mas enfoke no solamente cada bes riba e parti di prevencion secundario, pero e prevencion primario. Esey ta nifica preveni pa un hende no yega asina leu cu e riñon no ta funciona mas. Hopi daño por wordo preveni, pero cada persona mester haci esaki di un manera facil.

Pa preveni pa bira dialyse, mester hiba un bida saludabel. Come saludabel, pero come varia unda ta evita cierto cosnan manera alcohol, tabaco, salo y vet. Pero tambe mester move tur dia y bebe awa. “Tin cosnan hopi simpel cu bo por haci pa preveni dialyse,” e mandatario a agrega.

Tur esunnan cu tabata presente na e ceremonia, a haya e oportunidad di cana den e edificio di dialyse. Aki nan a haya e oportunidad di mira kico ta e trabounan cu ta wordo eherce den e departamento di dialyse.