Segun resumen di Departamento di Salubridad Publico DVG ayera, riba desaroyonan di pandemia di Covid-19 na Aruba, ayera tabatin 34 persona interna di hospital, y datonan ta mustra cu 82% di nan no a vacuna.
DVG a informa cu ayera tabatin 78 persona cu a recupera di Covid-19, e malesa causa pa e virus SARS-CoV-2. Ademas a registra un total di 74 caso nobo di COVID-19, di cual 6 ta turista y 68 ta residente. E cifranan aki ta representa un tasa di positividad entre nos residentenan di 38%. Cantidad di casonan activo di COVID-19 pa ayera ta 803 y cantidad di fayecidonan relaciona cu COVID-19 ta 111.
Segun DVG, nan datonan ta ilustra un aumento continuo di casonan nobo, cu un averahe semanal di 109 caso pa dia y un averahe di tasa di positividad semanal di 31% pa dia, cu ta sigui aumenta.
Di e 34 persona cu tin interna den Hospital Dr. Horacio Oduber, siete ta den Unidad di Cuido Intensivo ICU, 26 ta isola riba piso general, mientras uno ta riba piso di maternidad. Datonan di hospital ta ilustra cu di tur esnan ingresa den hospital cu COVID, 82% no tin ningun vacuna. Pa loke ta esnan interna den ICU por informa cu ningun ta vacuna.
