E erupcion di Volcan de Fuego a presenta un tragedia en general, cu 69 morto registra oficialmente, pero especialmente pa e habitantenan cu a perde tur cos: cas, cultivo, famia.
Pa Eva Ascon e tragedia tabata ainda pio, perdiendo entre otro seis sobrino, cu a ser haya den un vivienda na San Miguel Los Lotes, bario di e aldea El Rodeo, cu a keda sepulta bao di shinishi y santo di e volcan. Tur e rumannan Ascon tabata den e mesun camber y cama, brasa, manera tratando di protege nan mes contra e furia di e volcan.
Na e lugar di e tragedia, Eva Ascon, tia di e muchanan, ta yora y sufri. Unico cos cu ta importa awor ta pa e cuerponan di socoro haya e restonan di e sernan keri pa duna nan un entiero cristian.
“Mi kier pa nan entrega mi e huesonan di mi famia, mi kier pa nan no lubida nan, pa nan busca nan, pasobra nos kier dera nan,” e muhe ta bisa. E mes ta biba na capital di e pais, y a haya sa di e tragedia diadomingo atardi.
Mey mey di lagrima di desesperacion, Ascon ta sopecha cu, incluso dialuna mainta su parientenan tabata bibo, pasobra el a yama nan banda di 6 or y un di nan a contesta, aunke e no a papia. “Solamente tabata scucha un zonido straño, manera awa cu ta core,” e ta corda.
E muchanan, parti di e 69 mortonan conta te cierto momento, a ser identifica pa e tia como Joel, di 9 aña; Iralio, 8; Angela Teresa, 6; Joab, 4; Cecia, 3; y Abisai, 1; tur di fam Ascon Muralles. E mayornan di e rumannan, Joel Ascon (ruman di Eva) y Dilsa Muralles no a aparece, mientras cu Eva ta teme lo peor, ya cu e no a logra papia cu nan mas.
Cerca di e vivienda bomberonan a haya tres cadaver di adulto, pero nan no ta reconocibel. Eva ta bisa cu e lo purba cu prueba di DNA pa identifica nan y dera nan.
