Segun resumen di ayera di Departamento di Salubridad Publico, DVG, pa loke ta cifranan di e pandemia di Covid-19 na Aruba, ayera tabatin 31 persona hospitalisa.
Hospital a informa cu di e total di 31 persona hospitalisa, 12 ta den Unidad di Cuido Intensivo (ICU), mientras 19 ta riba unidad general di Covid.
Ademas, DVG a informa cu 28 persona a recupera. A registra un total di 39 caso nobo di Covid-19. Di esakinan, 38 ta residente di Aruba y uno no ta residente. Cu esaki, e cantidad di caso activo a keda na 523 caso, y e cantidad di fayecido relaciona cu Covid-19 no a conoce aumento y ta keda na 52 persona.
E cantidad di test ehecuta diamars, manera reporta den resumen di ayera, tabata 336 test na e diferente localidadnan di Aruba, incluyendo laboratorio di hospital, laboratorionan priva y aeropuerto. E tasa di positividad (‘positivity rate’) entre residentenan ta na 17%.
Ta haci un apelacion na comunidad un biaha mas pa cumpli cu tur protocol di DVG pa preveni transmision di e virus, principalmente, door di observa medidanan di distanciamento social, laba man, y bisti tapaboca.
